കൊച്ചി: രാജ്യത്തെ വിവിധ നഗരങ്ങളിലെ ഓൺലൈൻ ഭക്ഷണ-സാധന വിതരണ രംഗത്ത് ജോലി ചെയ്യുന്ന തൊഴിലാളികൾക്ക് കനത്ത തിരിച്ചടിയായി ഇന്ധനവില വർധനവ്. നാല് ദിവസത്തിനിടെ രണ്ട് തവണ ഇന്ധനവില വർധിപ്പിച്ചത് ഇവരുടെ ദൈനംദിന വരുമാനത്തെ സാരമായി ബാധിച്ചിരിക്കുകയാണ് . പ്രതിദിനം ശരാശരി 250 കിലോമീറ്ററോളം സഞ്ചരിക്കുന്ന ഒരു ഡെലിവറി പങ്കാളിക്ക് 500 രൂപയോളം പെട്രോളിനായി മാത്രം ചെലവാകുന്നു. വില വർധനയോടെ ദിവസേന 20 മുതൽ 25 രൂപ വരെ അധികമായി കണ്ടെത്തേണ്ടി വരുന്നത് ആഴ്ചാവസാനം വലിയൊരു തുകയുടെ കുറവുണ്ടാക്കുന്നു. 12 മണിക്കൂർ ജോലി ചെയ്ത് ഏകദേശം 2000 രൂപയോളം സമ്പാദിക്കുന്നവർക്ക് ഇതിൽ 500 രൂപ പെട്രോളിനും, ബാക്കി തുക താമസത്തിനും ഭക്ഷണത്തിനുമായി ചെലവാകുന്നു. ഇന്ധനവില കൂടുന്നതോടെ കയ്യിൽ ലഭിക്കുന്ന തുച്ഛമായ ലാഭം പോലും ഇല്ലാതാകുന്ന അവസ്ഥയാണ്. കിലോമീറ്ററിന് 4 മുതൽ 5 രൂപ വരെയാണ് പല കമ്പനികളും നൽകുന്നത്. ഇന്ധനവില വർധിക്കുന്നതിന് ആനുപാതികമായി കമ്പനികൾ തങ്ങൾക്ക് നൽകുന്ന പ്രതിഫലം (Payout) വർധിപ്പിക്കണമെന്നാണ് തൊഴിലാളികളുടെ ആവശ്യം. പ്രതിഫലം വർധിപ്പിക്കണമെന്ന ആവശ്യവുമായി സ്വിഗ്ഗി, സൊമാറ്റോ, ബ്ലിങ്കിറ്റ് തുടങ്ങിയ പ്ലാറ്റ്‌ഫോമുകളിലെ തൊഴിലാളികൾ കഴിഞ്ഞ ദിവസം അഞ്ച് മണിക്കൂർ പണിമുടക്ക് നടത്തിയിരുന്നു.ഗ്യാസ് ക്ഷാമം മൂലം ഹോട്ടലുകളിൽ തിരക്ക് കൂടുന്നതും ഓർഡറുകൾ കുറയുന്നതും ഇവരുടെ കാത്തിരിപ്പ് സമയം വർധിപ്പിക്കുകയും വരുമാനത്തെ ബാധിക്കുകയും ചെയ്യുന്നുണ്ട്.ചുരുക്കത്തിൽ, വെയിലും മഴയും അവഗണിച്ച് പണിയെടുക്കുന്ന ഈ തൊഴിലാളികൾക്ക് ഇന്ധനവില വർധനവ് താങ്ങാനാവാത്ത ഭാരമായി മാറിയിരിക്കുകയാണ്. കമ്പനികൾ ഉടൻ ഇടപെട്ടില്ലെങ്കിൽ ജീവിതം മുന്നോട്ട് കൊണ്ടുപോകാൻ ബുദ്ധിമുട്ടാണെന്ന് ഇവർ പറയുന്നു.