കൊച്ചി: നിവിൻ പോളിയുടെ ‘ഏഴു കടൽ ഏഴു മലൈ’യുടെ കേരളത്തിലെ തിയറ്റർ വിതരണാവകാശം ദുൽഖർ സൽമാന്റെ ഉടമസ്ഥതയിലുള്ള വേഫെറർ ഫിലിംസ് സ്വന്തമാക്കി. സംവിധായകൻ റാം രചനയും സംവിധാനവും നിർവഹിക്കുന്ന ചിത്രം ഒക്ടോബർ 1ന് ലോകമെമ്പാടുമുള്ള തിയറ്ററുകളിൽ റിലീസ് ചെയ്യും. നിവിൻ പോളിക്കൊപ്പം അഞ്ജലിയും സൂരിയും പ്രധാന കഥാപാത്രങ്ങളിലെത്തുന്ന ചിത്രം റൊമാന്റിക്, സൈക്കോളജിക്കൽ ഫാന്റസി സ്വഭാവത്തിലുള്ളതാണ്. 8,000 വർഷത്തിലേറെ പഴക്കമുള്ള അമരനായ മനുഷ്യനെയാണ് നിവിൻ പോളി അവതരിപ്പിക്കുന്നത്. 32 വയസ്സുള്ള ഒരു സാധാരണക്കാരനും ഈ അമരനും മഴയുള്ള രാത്രിയിൽ ഓടിക്കൊണ്ടിരിക്കുന്ന ട്രെയിനിൽവച്ച് കണ്ടുമുട്ടുന്നതോടെയാണ് കഥ വികസിക്കുന്നത്.
‘തങ്ക മീൻകൾ’, ‘പേരൻപ്’ തുടങ്ങിയ ചിത്രങ്ങളിലൂടെ ശ്രദ്ധ നേടിയ സംവിധായകൻ റാമിന്റെ വേറിട്ട സിനിമാ സമീപനമാണ് ചിത്രത്തിന്റെ മറ്റൊരു പ്രത്യേകത. ജീവൻ, സ്നേഹം, മരണം, മനുഷ്യനും പ്രകൃതിയും തമ്മിലുള്ള ബന്ധം തുടങ്ങിയ ആശയങ്ങൾ ഫാന്റസിയുടെയും ത്രില്ലറിന്റെയും പശ്ചാത്തലത്തിൽ ചിത്രം അവതരിപ്പിക്കുന്നുവെന്നാണ് ലഭ്യമായ വിവരങ്ങൾ.
യുവൻ ശങ്കർ രാജയാണ് ചിത്രത്തിന്റെ സംഗീതവും പശ്ചാത്തലസംഗീതവും ഒരുക്കുന്നത്. വി ഹൗസ് പ്രൊഡക്ഷൻസിന്റെ ബാനറിൽ സുരേഷ് കാമാച്ചിയാണ് നിർമ്മാണം. നിവിൻ പോളിയുടെ തമിഴ് സിനിമയിലേക്കുള്ള തിരിച്ചുവരവ് കൂടിയാണ് ‘ഏഴു കടൽ ഏഴു മലൈ’; 2017ൽ പുറത്തിറങ്ങിയ ‘റിച്ചി’ക്കു ശേഷമുള്ള പ്രധാന തമിഴ് ചിത്രം കൂടിയാണിത്. 2024ലെ ഇന്റർനാഷണൽ ഫിലിം ഫെസ്റ്റിവൽ റോട്ടർഡാം ഉൾപ്പെടെയുള്ള അന്താരാഷ്ട്ര ചലച്ചിത്രമേളകളിൽ ചിത്രം പ്രദർശിപ്പിച്ചിരുന്നു. മോസ്കോ അന്താരാഷ്ട്ര ചലച്ചിത്രമേളയിലും ചിത്രം ഇടം നേടിയിട്ടുണ്ട്. കേരളത്തിലെ വിതരണാവകാശം വേഫെറർ ഫിലിംസ് ഏറ്റെടുത്തതോടെ ചിത്രത്തിന്റെ കേരള റിലീസിനും കൂടുതൽ ശ്രദ്ധ ലഭിച്ചിരിക്കുകയാണ്.