വാഷിങ്ടൺ: ബഹിരാകാശത്ത് ആയുധങ്ങൾ വിന്യസിച്ചിട്ടുണ്ടെന്ന് ആദ്യമായി പരസ്യമായി സ്ഥിരീകരിച്ച് അമേരിക്ക. ഭൂമിയുടെ ഭ്രമണപഥത്തിൽ പ്രവർത്തിക്കുന്ന ‘ബഹിരാകാശ നിയന്ത്രണ ആയുധങ്ങൾ’ നിലവിലുണ്ടെന്ന് അമേരിക്കൻ വ്യോമസേനാ സെക്രട്ടറി ട്രോയ് മെയ്ങ്ക് വ്യക്തമാക്കി. അമേരിക്കൻ സൈനിക സേനകളെ ശത്രുക്കളുടെ ആക്രമണങ്ങളിൽ നിന്ന് സംരക്ഷിക്കുന്നതിനാണ് ഇവ ഉപയോഗിക്കുകയെന്നും അദ്ദേഹം പറഞ്ഞു.
മേരിലാൻഡിലെ നാഷണൽ ഹാർബറിൽ നടന്ന എയർ, സ്പേസ് ആൻഡ് സൈബർ സമ്മേളനത്തിലാണ് മെയ്ങ്കിന്റെ നിർണായക പ്രഖ്യാപനം. മാറിക്കൊണ്ടിരിക്കുന്ന ഭീഷണികളെ നേരിടാൻ അമേരിക്ക തയ്യാറെടുക്കുകയാണെന്നും അതിന്റെ ഭാഗമായി ഭ്രമണപഥത്തിൽ ബഹിരാകാശ നിയന്ത്രണ ആയുധങ്ങൾ ഇപ്പോൾ അമേരിക്കയ്ക്കുണ്ടെന്നും അദ്ദേഹം വ്യക്തമാക്കി.
എന്നാൽ എന്തുതരം ആയുധമാണ് ഭ്രമണപഥത്തിൽ വിന്യസിച്ചിരിക്കുന്നത്, എത്ര എണ്ണം ഉണ്ട്, എപ്പോൾ വിക്ഷേപിച്ചു തുടങ്ങിയ വിവരങ്ങൾ അമേരിക്ക പുറത്തുവിട്ടിട്ടില്ല. ആയുധത്തിന്റെ ശേഷിയെക്കുറിച്ചുള്ള വിശദാംശങ്ങൾ വെളിപ്പെടുത്തുന്നത് പ്രതിരോധ തന്ത്രത്തിന് ഗുണകരമാകില്ലെന്ന നിലപാടിലാണ് അമേരിക്ക. മെയ്ങ്കിന്റെ പ്രഖ്യാപനം തന്നെ എതിരാളികൾക്കുള്ള പ്രതിരോധ മുന്നറിയിപ്പിന്റെ ഭാഗമാണെന്നും റിപ്പോർട്ടുകൾ വ്യക്തമാക്കുന്നു.
ആക്രമണത്തിനും പ്രതിരോധത്തിനും ഉപയോഗിക്കാം
അമേരിക്കൻ ബഹിരാകാശ സേനയുടെ വിശദീകരണമനുസരിച്ച്, ‘ബഹിരാകാശ നിയന്ത്രണം’ എന്നതിൽ ശത്രുവിന്റെ ബഹിരാകാശ ശേഷികളെ തടസ്സപ്പെടുത്തുക, ദുർബലപ്പെടുത്തുക, ആവശ്യമായാൽ നശിപ്പിക്കുക തുടങ്ങിയ പ്രവർത്തനങ്ങൾ ഉൾപ്പെടുന്നു. ഭൗതികമായി ലക്ഷ്യം തകർക്കുന്ന സംവിധാനങ്ങൾക്കൊപ്പം ആശയവിനിമയ സംവിധാനങ്ങളെ തടസ്സപ്പെടുത്തുന്ന ഇലക്ട്രോണിക് സംവിധാനങ്ങളും ഇതിൽ ഉൾപ്പെടാം. ഇവ പ്രതിരോധ ആവശ്യങ്ങൾക്കും ആക്രമണാത്മക ആവശ്യങ്ങൾക്കും ഉപയോഗിക്കാമെന്നാണ് അമേരിക്ക വ്യക്തമാക്കുന്നത്.
ആയുധത്തിന്റെ കൃത്യമായ സ്വഭാവം പുറത്തുവന്നിട്ടില്ലെങ്കിലും, ചില ബഹിരാകാശ സുരക്ഷാ വിദഗ്ധർ ഇത് ഉപഗ്രഹങ്ങളെ തകർക്കുന്നതിന് പകരം അവയുടെ പ്രവർത്തനം തടസ്സപ്പെടുത്തുന്ന സംവിധാനമായിരിക്കാമെന്ന് വിലയിരുത്തുന്നു. ഭൗതികമായി ഉപഗ്രഹങ്ങളെ തകർക്കുന്ന ആയുധങ്ങൾ ബഹിരാകാശ മാലിന്യം സൃഷ്ടിക്കുകയും മറ്റ് ഉപഗ്രഹങ്ങൾക്കും ഭീഷണിയാകുകയും ചെയ്യുന്നതിനാലാണ് ഇത്തരം സംവിധാനങ്ങൾക്ക് മുൻഗണന നൽകാനുള്ള സാധ്യത ചൂണ്ടിക്കാണിക്കുന്നത്.
‘ഗോൾഡൻ ഡോം’ പദ്ധതിയുമായി ബന്ധം
അമേരിക്കയുടെ പുതിയ നീക്കം പ്രസിഡന്റ് ഡോണൾഡ് ട്രംപിന്റെ ‘ഗോൾഡൻ ഡോം’ എന്ന ബഹിരാകാശാധിഷ്ഠിത മിസൈൽ പ്രതിരോധ പദ്ധതിയിലേക്കുള്ള നീക്കങ്ങൾ ശക്തമാകുന്നതിനിടെയാണ്. ബഹിരാകാശത്ത് നിന്നുള്ള മിസൈൽ പ്രതിരോധ സംവിധാനങ്ങൾ ഉൾപ്പെടെ വിപുലമായ സൈനിക ശേഷിയാണ് പദ്ധതിയിലൂടെ ലക്ഷ്യമിടുന്നത്. അമേരിക്ക ബഹിരാകാശാധിപത്യം നിലനിർത്തേണ്ടത് ദേശീയ സുരക്ഷയ്ക്ക് നിർണായകമാണെന്ന നിലപാടാണ് മെയ്ങ്ക് ആവർത്തിച്ചത്.
ബഹിരാകാശ ആയുധപ്പോരിന് വഴിയൊരുക്കുമോ?
അമേരിക്കയുടെ പ്രഖ്യാപനം ബഹിരാകാശത്തെ സൈനികവൽക്കരണം കൂടുതൽ ശക്തമാക്കുമെന്ന ആശങ്കയും ഉയർന്നിട്ടുണ്ട്. ചൈനയും റഷ്യയും ഇതിനകം തന്നെ ഉപഗ്രഹങ്ങളെ തടസ്സപ്പെടുത്താനും ആക്രമിക്കാനുമുള്ള പ്രതിരോധ ശേഷികൾ വികസിപ്പിക്കുന്നതായി അമേരിക്ക ആരോപിക്കുന്നുണ്ട്. അതേസമയം, അമേരിക്കയുടെ പുതിയ പ്രഖ്യാപനം മറ്റ് രാജ്യങ്ങൾക്ക് കൂടുതൽ ബഹിരാകാശ ആയുധങ്ങൾ വികസിപ്പിക്കുന്നതിനുള്ള കാരണമായി മാറാമെന്ന മുന്നറിയിപ്പും വിദഗ്ധർ നൽകുന്നു.
1967ലെ ബഹിരാകാശ ഉടമ്പടി ഭ്രമണപഥത്തിൽ ആണവായുധങ്ങളും മറ്റ് കൂട്ടനശീകരണ ആയുധങ്ങളും സ്ഥാപിക്കുന്നത് നിരോധിക്കുന്നുണ്ടെങ്കിലും പരമ്പരാഗത ആയുധങ്ങളെ പൂർണമായി നിരോധിക്കുന്നില്ല. അതിനാൽ അമേരിക്ക പ്രഖ്യാപിച്ചിരിക്കുന്ന തരത്തിലുള്ള പരമ്പരാഗത ബഹിരാകാശ ആയുധങ്ങളുടെ വിന്യാസം ഉടമ്പടിയുടെ പരിധിയിൽ നേരിട്ട് നിരോധിക്കപ്പെട്ടിട്ടില്ലെന്നാണ് വിദഗ്ധരുടെ വിലയിരുത്തൽ.
അമേരിക്കയുടെ ഈ പ്രഖ്യാപനം ബഹിരാകാശത്തെ ഭാവിയിലെ സൈനിക സംഘർഷങ്ങളുടെ പ്രധാന മേഖലയായി കണക്കാക്കുന്നുവെന്നതിന്റെ ഏറ്റവും വ്യക്തമായ സൂചനകളിലൊന്നാണ്. ആയുധത്തിന്റെ യഥാർഥ ശേഷി സംബന്ധിച്ച വിവരങ്ങൾ പുറത്തുവരുന്നതോടെ ആഗോള സുരക്ഷാ രംഗത്ത് ഇതിന്റെ പ്രത്യാഘാതം കൂടുതൽ വ്യക്തമാകും.