കൂത്തുപറമ്പ് : കൈരളി ബുക്സിന്റെയും മലയാളകലാനിലയത്തിന്റെയും നേതൃത്വത്തിൽ സംഘടിപ്പിക്കുന്ന ‘കലാകൈരളി’ പുസ്തകമേളയോടും സാംസ്കാരികോത്സവത്തോടും അനുബന്ധിച്ച് ഡോ. പി.കെ. ഭാഗ്യലക്ഷ്മി രചിച്ച ‘തീപിടിച്ച വിരലുകൾ (ചിത്രകലയിലെ സ്ത്രീകൾ)’ എന്ന പുസ്തകത്തിന്റെ രണ്ടാം പതിപ്പ് പ്രകാശനം ചെയ്തു.
കൂത്തുപറമ്പ് മാറോളിഘട്ട് ടൗൺ സ്ക്വയറിൽ നടന്ന ചടങ്ങിൽ എൻ. സുകന്യ ടീച്ചർ പുസ്തകത്തിന്റെ രണ്ടാം പതിപ്പ് പ്രകാശനം ചെയ്തു. വന്ദന പുസ്തകം ഏറ്റുവാങ്ങി.
വിനോദ് നരോത്ത് സ്വാഗതം പറഞ്ഞു. ഗീത ടീച്ചർ അധ്യക്ഷത വഹിച്ചു. പി.എം. മധുസൂദനൻ ആശംസകൾ നേർന്നു. പുസ്തകത്തിന്റെ രചയിതാവ് ഡോ. പി.കെ. ഭാഗ്യലക്ഷ്മി മറുപടി പറഞ്ഞു.
‘ചിത്രകലയിലെ സ്ത്രീകൾ’ എന്ന വിഷയത്തെ കേന്ദ്രീകരിച്ചുള്ള പുസ്തകത്തെ പരിചയപ്പെടുത്തുകയും അതുമായി ബന്ധപ്പെട്ട വിഷയത്തിൽ സംവാദം നടത്തുകയും ചെയ്തു. കലാകൈരളി പുസ്തകമേളയുടെയും സാംസ്കാരികോത്സവത്തിന്റെയും ഭാഗമായി സംഘടിപ്പിച്ച ചടങ്ങിൽ സാഹിത്യ-സാംസ്കാരിക രംഗത്തെ നിരവധി പേർ പങ്കെടുത്തു.