മുംബൈ: ടാറ്റ ഗ്രൂപ്പിന്റെ മാതൃസ്ഥാപനമായ ടാറ്റ സൺസിന്റെ അടുത്ത ചെയർമാനെ കണ്ടെത്താനുള്ള ചർച്ചകൾ നിർണായക ഘട്ടത്തിലേക്ക്. നിലവിലെ ചെയർമാൻ എൻ. ചന്ദ്രശേഖരന് പകരക്കാരനായി ടാറ്റ ഗ്രൂപ്പിന് പുറത്തുനിന്നുള്ള പ്രമുഖ കോർപ്പറേറ്റ് മേധാവിയും പരിഗണനയിലെത്തിയതായി റിപ്പോർട്ട്. നാഷണൽ സ്റ്റോക്ക് എക്സ്ചേഞ്ച് (എൻഎസ്ഇ) മാനേജിങ് ഡയറക്ടറും ചീഫ് എക്സിക്യൂട്ടീവ് ഓഫിസറുമായ ആശിഷ് ചൗഹാനാണ് മത്സരത്തിലെ പുതിയ ശ്രദ്ധാകേന്ദ്രം.
നിലവിൽ ടാറ്റ സ്റ്റീൽ എംഡിയും സിഇഒയുമായ ടി.വി. നരേന്ദ്രൻ, ടാറ്റ സൺസ് എക്സിക്യൂട്ടീവ് ഡയറക്ടറും ഗ്രൂപ്പ് ചീഫ് ഫിനാൻഷ്യൽ ഓഫിസറുമായ സൗരഭ് അഗ്രവാൾ എന്നിവർക്കൊപ്പം ആശിഷ് ചൗഹാന്റെ പേരും പരിഗണനയിലുണ്ടെന്നാണ് റിപ്പോർട്ടുകൾ. ഇതോടെ ചെയർമാൻ സ്ഥാനത്തേക്കുള്ള മത്സരം കൂടുതൽ ശ്രദ്ധേയമായി.
ടാറ്റ സ്റ്റീലിന്റെ ആഗോള പ്രവർത്തനങ്ങൾക്ക് നേതൃത്വം നൽകുന്ന ടി.വി. നരേന്ദ്രനെ ആഭ്യന്തര സ്ഥാനാർഥികളിൽ മുന്നിലെത്തിയ വ്യക്തിയായാണ് റിപ്പോർട്ടുകൾ വിലയിരുത്തുന്നത്. മൂന്ന് പതിറ്റാണ്ടിലേറെ നീളുന്ന ടാറ്റ സ്റ്റീലിലെ പരിചയവും വലിയ വ്യവസായ സ്ഥാപനത്തെ നയിച്ച അനുഭവവുമാണ് അദ്ദേഹത്തിന്റെ പ്രധാന കരുത്ത്.
അതേസമയം, ടാറ്റ സൺസിന്റെ ഗ്രൂപ്പ് സിഎഫ്ഒയായ സൗരഭ് അഗ്രവാളിന് സാമ്പത്തിക ആസൂത്രണം, മൂലധന വിനിയോഗം, നിക്ഷേപ തീരുമാനങ്ങൾ തുടങ്ങിയ മേഖലകളിലെ പരിചയമാണ് നേട്ടം. ടാറ്റ ഗ്രൂപ്പ് സമീപകാലത്ത് നടത്തിയ വലിയ നിക്ഷേപങ്ങളുടെയും മൂലധന വിനിയോഗ തീരുമാനങ്ങളുടെയും പിന്നിലെ പ്രധാന വ്യക്തികളിലൊരാളായാണ് അഗ്രവാളിനെ വിലയിരുത്തുന്നത്.
ആരാണ് ആശിഷ് ചൗഹാൻ?
മൂലധന വിപണി, സാങ്കേതികവിദ്യ, ധനകാര്യ സേവനങ്ങൾ എന്നീ മേഖലകളിൽ ദീർഘകാല പരിചയമുള്ള വ്യക്തിയാണ് ആശിഷ് ചൗഹാൻ. നാഷണൽ സ്റ്റോക്ക് എക്സ്ചേഞ്ചിന്റെ രൂപീകരണ ഘട്ടത്തിൽ പ്രവർത്തിച്ചവരിൽ ഒരാളായ അദ്ദേഹം നേരത്തെ ബോംബെ സ്റ്റോക്ക് എക്സ്ചേഞ്ചിന്റെ (ബിഎസ്ഇ) എംഡിയും സിഇഒയുമായിരുന്നു. 2022ലാണ് എൻഎസ്ഇയുടെ എംഡിയും സിഇഒയുമായി അദ്ദേഹം വീണ്ടും ചുമതലയേറ്റത്.
എൻഎസ്ഇയുടെ നിർണായകമായ പ്രാരംഭ ഓഹരി വിൽപ്പനയ്ക്കുള്ള (ഐപിഒ) പ്രവർത്തനങ്ങൾക്കും ചൗഹാൻ നേതൃത്വം നൽകുന്നുണ്ട്. ഏകദേശം 5 ലക്ഷം കോടി രൂപ മൂല്യം കണക്കാക്കപ്പെടുന്ന എൻഎസ്ഇയുടെ ഐപിഒ പൂർത്തിയായാൽ രാജ്യത്തെ ഏറ്റവും മൂല്യമേറിയ കമ്പനികളുടെ നിരയിൽ സ്ഥാപനത്തിന് ഇടം നേടാനാകുമെന്നാണ് റിപ്പോർട്ടുകൾ.
ചന്ദ്രശേഖരന് ശേഷം ആര്?
എൻ. ചന്ദ്രശേഖരൻ നിലവിലെ കാലാവധി 2027 ഫെബ്രുവരിയിൽ അവസാനിക്കുന്നതോടെ വീണ്ടും ചെയർമാൻ സ്ഥാനത്തേക്ക് മത്സരിക്കില്ലെന്ന് വ്യക്തമാക്കിയതോടെയാണ് ടാറ്റ സൺസിലെ പിൻഗാമിയെ കണ്ടെത്താനുള്ള നടപടികൾ സജീവമായത്. ടാറ്റ സൺസിന്റെ അടുത്ത ചെയർമാനെ തിരഞ്ഞെടുക്കുന്നതിൽ ടാറ്റ സൺസ് ബോർഡിനും ടാറ്റ ട്രസ്റ്റുകൾക്കും നിർണായക പങ്കുണ്ടാകും.
ടാറ്റ ട്രസ്റ്റ്സ് ചെയർമാൻ നോയൽ ടാറ്റയുടെ നേതൃത്വത്തിലും പിൻഗാമിയെ കണ്ടെത്തുന്നതിനുള്ള ചർച്ചകൾ നടക്കുന്നുവെന്നാണ് റിപ്പോർട്ടുകൾ. അതേസമയം, ടാറ്റ ട്രസ്റ്റുകളിലെ ചില ഭരണപരമായ വിഷയങ്ങൾ തിരഞ്ഞെടുപ്പ് നടപടികളെയും സ്വാധീനിക്കുന്നുണ്ട്. അടുത്തിടെ സർ രത്തൻ ടാറ്റ ട്രസ്റ്റിന്റെ യോഗങ്ങൾ സംബന്ധിച്ച നിയന്ത്രണങ്ങൾ നീക്കണമെന്നാവശ്യപ്പെട്ട് ട്രസ്റ്റിമാർ മഹാരാഷ്ട്ര ചാരിറ്റി കമ്മിഷണറെ സമീപിച്ചിരുന്നു. അടുത്ത ടാറ്റ സൺസ് ചെയർമാനെ തിരഞ്ഞെടുക്കുന്നതിൽ ട്രസ്റ്റിന്റെ പങ്കാളിത്തവും ഇതോടെ പ്രധാന വിഷയമായി മാറിയിട്ടുണ്ട്.
ടാറ്റ ഗ്രൂപ്പ് ഇപ്പോൾ വിമാനയാനം, സെമികണ്ടക്ടർ, ഡിജിറ്റൽ ബിസിനസ് തുടങ്ങിയ മേഖലകളിൽ വലിയ പദ്ധതികളുമായി മുന്നോട്ടുപോകുന്ന ഘട്ടത്തിലാണ്. അതിനാൽ അടുത്ത ചെയർമാന്റെ തിരഞ്ഞെടുപ്പ് ഗ്രൂപ്പിന്റെ ഭാവി തന്ത്രങ്ങളിലും നിക്ഷേപ തീരുമാനങ്ങളിലും നിർണായക സ്വാധീനം ചെലുത്തുമെന്നാണ് വിലയിരുത്തൽ.
എന്നാൽ, അന്തിമ തീരുമാനം ഇതുവരെ ഉണ്ടായിട്ടില്ല. ടി.വി. നരേന്ദ്രൻ, സൗരഭ് അഗ്രവാൾ, ആശിഷ് ചൗഹാൻ എന്നിവരിൽ ആരാകും ടാറ്റ സൺസിന്റെ അടുത്ത ചെയർമാനാകുകയെന്നത് വരും മാസങ്ങളിൽ വ്യക്തമാകും.