കോഴിക്കോട്: അന്തരിച്ച നടിയും നാടകപ്രവർത്തകയുമായ സാവിത്രി ശ്രീധരനെ അനുസ്മരിച്ച് ‘സുഡാനി ഫ്രം നൈജീരിയ’യിലെ നായകൻ സാമുവൽ അബിയോള റോബിൻസൺ. സാവിത്രി അവതരിപ്പിച്ച ജമീലയും സാമുവൽ അവതരിപ്പിച്ച സുഡുവും തമ്മിലുള്ള അമ്മ–മകൻ ബന്ധം പ്രേക്ഷകർ ഏറെ ഇഷ്ടപ്പെട്ടിരുന്നു. സിനിമയ്ക്കു പുറത്തും സാവിത്രി തന്നോട് അതേ സ്നേഹവും കരുതലുമാണ് കാണിച്ചിരുന്നതെന്ന് സാമുവൽ ഓർത്തെടുത്തു.
2017ൽ ‘സുഡാനി ഫ്രം നൈജീരിയ’യുടെ ചിത്രീകരണ സമയത്ത് തനിക്ക് മലയാളം അറിയില്ലായിരുന്നുവെന്നും സാവിത്രിക്ക് ഇംഗ്ലീഷ് അറിയില്ലായിരുന്നുവെന്നും സാമുവൽ പറഞ്ഞു. ഭാഷ വ്യത്യസ്തമായിരുന്നെങ്കിലും സാവിത്രി എന്നും തന്റെ കാര്യങ്ങൾ അന്വേഷിക്കുമായിരുന്നു. ഭക്ഷണം കഴിച്ചോ, വിശക്കുന്നുണ്ടോ തുടങ്ങിയ കാര്യങ്ങൾ ചോദിക്കുകയും ഭക്ഷണം കഴിച്ചിട്ടില്ലെന്ന് അറിഞ്ഞാൽ നിർമാതാക്കളോടോ പ്രൊഡക്ഷൻ മാനേജരോടോ പറഞ്ഞ് ഭക്ഷണം ലഭിക്കുന്നുണ്ടെന്ന് ഉറപ്പാക്കുകയും ചെയ്തിരുന്നുവെന്നും സാമുവൽ അനുസ്മരിച്ചു.
“സിനിമയിൽ ജമീല സുഡുവിനോട് എങ്ങനെയാണോ സ്നേഹത്തോടെ പെരുമാറിയത്, യഥാർഥ ജീവിതത്തിലും സാവിത്രി അങ്ങനെ തന്നെയായിരുന്നു” എന്നാണ് സാമുവൽ പറഞ്ഞത്. സാവിത്രിയുടെ വിയോഗം ലോകത്തിന് തന്നെയുള്ള വലിയ നഷ്ടമാണെന്നും അദ്ദേഹം വ്യക്തമാക്കി. നല്ലൊരു ജീവിതം നയിക്കാനും മികച്ച സിനിമകളുടെ ഭാഗമാകാനും പ്രേക്ഷകരുടെ സ്നേഹം നേരിട്ട് അനുഭവിക്കാനും സാവിത്രിക്ക് കഴിഞ്ഞതിൽ സന്തോഷമുണ്ടെന്നും സാമുവൽ പറഞ്ഞു.
സാവിത്രിയുടെ വിയോഗവാർത്ത അറിഞ്ഞതിന് പിന്നാലെ ഇൻസ്റ്റഗ്രാമിലും സാമുവൽ വികാരനിർഭരമായ കുറിപ്പ് പങ്കുവച്ചിരുന്നു. “അവർ ഇപ്പോൾ സ്വർഗത്തിലെ മാലാഖയാണ്. സമാധാനത്തോടെ വിശ്രമിക്കൂ സാവിത്രി മാഡം” എന്നായിരുന്നു കുറിപ്പ്. വിയോഗവാർത്ത കേട്ട് താൻ ഏറെ തകർന്നുപോയെന്നും സാവിത്രി അതുല്യയായ അഭിനേത്രിയും മികച്ച വ്യക്തിയുമായിരുന്നെന്നും അദ്ദേഹം കുറിച്ചു.
2018ൽ പുറത്തിറങ്ങിയ സക്കരിയ മുഹമ്മദ് സംവിധാനം ചെയ്ത ‘സുഡാനി ഫ്രം നൈജീരിയ’യാണ് സാവിത്രി ശ്രീധരനെ മലയാളികൾക്കിടയിൽ ഏറെ ശ്രദ്ധേയയാക്കിയത്. ചിത്രത്തിലെ ജമീല എന്ന കഥാപാത്രത്തിന് മികച്ച സ്വഭാവനടിക്കുള്ള കേരള സംസ്ഥാന ചലച്ചിത്ര പുരസ്കാരവും ദേശീയ ചലച്ചിത്ര പുരസ്കാര ജൂറിയുടെ പ്രത്യേക പരാമർശവും ലഭിച്ചിരുന്നു.
സിനിമയിലെത്തുന്നതിന് ഏറെ മുമ്പേ സാവിത്രിയുടെ കലാജീവിതം നാടകവേദിയിലായിരുന്നു. ഏകദേശം അഞ്ച് പതിറ്റാണ്ടോളം പ്രഫഷണൽ നാടക രംഗത്ത് സജീവമായിരുന്ന അവർ മികച്ച നാടക നടിക്കുള്ള സംസ്ഥാന പുരസ്കാരവും നേടിയിട്ടുണ്ട്.
സാവിത്രിയെ ഒരിക്കലും മറക്കരുതെന്നും അവർ സമ്മാനിച്ച കഥാപാത്രങ്ങളും സിനിമകളും എന്നും ഓർമിക്കണമെന്നും സാമുവൽ പറഞ്ഞു. അവരുടെ മികച്ച അഭിനയം നേരിട്ട് അനുഭവിക്കാൻ കഴിഞ്ഞ തലമുറയിൽ ജീവിക്കാനായത് ഭാഗ്യമാണെന്നും അദ്ദേഹം കൂട്ടിച്ചേർത്തു.