-1.jpeg&w=3840&q=75)
ന്യൂഡൽഹി: ഉത്തരാഖണ്ഡിലെ ഹൽദ്വാനിയിൽ കോൺഗ്രസ് അധ്യക്ഷൻ മല്ലികാർജുൻ ഖർഗെ പങ്കെടുത്ത പരിപാടിയുടെ വേദിയിൽ നടന്ന ‘ശുദ്ധീകരണ’ ചടങ്ങുമായി ബന്ധപ്പെട്ട പരാമർശങ്ങളുടെ പേരിൽ ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ പൊലീസ് കേസ്. മതപരമായ ചടങ്ങിനെ ജാതീയമായി ചിത്രീകരിച്ചെന്നും വാൽമീകി സമൂഹത്തിന്റെ വികാരം വ്രണപ്പെടുത്തിയെന്നും ആരോപിച്ചാണ് ഹൽദ്വാനി കോട്വാലി പൊലീസ് എഫ്ഐആർ രജിസ്റ്റർ ചെയ്തത്.
ജവഹർ നഗർ കോളനി സ്വദേശിയും ശ്രീരാമ സേന ധർമാർഥ സേവ ന്യാസിന്റെ ഭാരവാഹിയുമായ അമിത് കുമാർ നൽകിയ പരാതിയുടെ അടിസ്ഥാനത്തിലാണ് നടപടി. ശുദ്ധീകരണ ചടങ്ങിലും തുടർന്ന് നടന്ന ശുചീകരണ പ്രവർത്തനങ്ങളിലും താൻ പങ്കെടുത്തിരുന്നുവെന്ന് പരാതിക്കാരൻ പറയുന്നു. ഓഗസ്റ്റ് 29ന് ഡൽഹിയിൽ നടത്തിയ വാർത്താസമ്മേളനത്തിൽ രാഹുൽ ഗാന്ധി നടത്തിയ പരാമർശങ്ങൾ തന്റെ സമൂഹത്തിന്റെ വികാരത്തെ വ്രണപ്പെടുത്തിയെന്നാണ് പരാതിയിലെ ആരോപണം.
സംഭവത്തിന് പിന്നിൽ
ഹൽദ്വാനിയിലെ രാംലീല മൈതാനത്താണ് വിവാദത്തിന് തുടക്കമായ സംഭവം നടന്നത്. ഓഗസ്റ്റ് എട്ടിന് കോൺഗ്രസ് അധ്യക്ഷൻ മല്ലികാർജുൻ ഖർഗെ ഇവിടെ പൊതുസമ്മേളനത്തിൽ പങ്കെടുത്തിരുന്നു. ഇതിന് മൂന്ന് ദിവസത്തിന് ശേഷം, ഓഗസ്റ്റ് 11ന്, സ്ഥലത്ത് ‘ശുദ്ധീകരണ യജ്ഞം’ നടത്തിയതാണ് വിവാദമായത്.
ഖർഗെ പട്ടികജാതി വിഭാഗത്തിൽപ്പെട്ട നേതാവായതിനാലാണ് വേദി ശുദ്ധീകരിച്ചതെന്ന തരത്തിലാണ് കോൺഗ്രസ് സംഭവത്തെ വിമർശിച്ചത്. ഇത് അയിത്തത്തിന്റെ മറ്റൊരു രൂപമാണെന്നും ദലിതർക്കെതിരായ വിവേചനമാണെന്നും രാഹുൽ ഗാന്ധി ആരോപിച്ചിരുന്നു. സംഭവത്തിൽ ബന്ധപ്പെട്ടവർക്കെതിരെ പട്ടികജാതി-പട്ടികവർഗ അതിക്രമ നിരോധന നിയമപ്രകാരം എഫ്ഐആർ രജിസ്റ്റർ ചെയ്യണമെന്നും അദ്ദേഹം പ്രധാനമന്ത്രി നരേന്ദ്ര മോദിയോട് ആവശ്യപ്പെട്ടിരുന്നു.
എന്നാൽ ശുദ്ധീകരണ ചടങ്ങിന് ഖർഗെയുടെ ജാതിയുമായി യാതൊരു ബന്ധവുമില്ലെന്നാണ് ചടങ്ങിൽ പങ്കെടുത്തവരുടെ വാദം. കോൺഗ്രസ് പരിപാടിക്ക് ശേഷം മൈതാനത്ത് മാലിന്യം അവശേഷിച്ചെന്നും മതപരമായ സ്ഥലത്ത് അനുചിതമായ മുദ്രാവാക്യങ്ങൾ ഉയർന്നതായും ചൂണ്ടിക്കാട്ടിയാണ് ചടങ്ങ് നടത്തിയതെന്നാണ് അവരുടെ വിശദീകരണം. ചടങ്ങിന് പിന്നിൽ ബിജെപിക്ക് യാതൊരു ബന്ധവുമില്ലെന്നും ഉത്തരാഖണ്ഡ് ബിജെപി നേതൃത്വം വ്യക്തമാക്കിയിട്ടുണ്ട്.
രാഹുലിനെതിരെയുള്ള ആരോപണം
ശുദ്ധീകരണ ചടങ്ങിനെ അയിത്തവുമായി ബന്ധപ്പെടുത്തിയും പട്ടികജാതിക്കാർക്കെതിരായ അതിക്രമമായി വിശേഷിപ്പിച്ചുമാണ് രാഹുൽ ഗാന്ധി പ്രതികരിച്ചതെന്ന് പരാതിക്കാരൻ ആരോപിക്കുന്നു. ചടങ്ങിൽ വിവിധ വിഭാഗങ്ങളിൽപ്പെട്ടവരും പട്ടികജാതി വിഭാഗത്തിൽപ്പെട്ടവരും പങ്കെടുത്തിരുന്നുവെന്നും അതിനാൽ സംഭവത്തിന് ജാതീയമായ പശ്ചാത്തലം നൽകിയത് തെറ്റാണെന്നും പരാതിയിൽ പറയുന്നു.
രാഹുൽ ഗാന്ധിയുടെ പരാമർശങ്ങൾ വിവിധ വിഭാഗങ്ങൾക്കിടയിൽ ശത്രുതയും സംഘർഷവും വളർത്താൻ ഇടയാക്കുമെന്ന ആരോപണവും പരാതിയിൽ ഉന്നയിച്ചിട്ടുണ്ട്.
ഏത് വകുപ്പുകൾ പ്രകാരം?
വിവിധ വിഭാഗങ്ങൾക്കിടയിൽ ശത്രുത വളർത്തുന്നതുമായി ബന്ധപ്പെട്ട ഭാരതീയ ന്യായ സംഹിതയിലെ വകുപ്പുകളും മതവികാരം വ്രണപ്പെടുത്തുന്ന തരത്തിലുള്ള മനഃപൂർവമായ പ്രവൃത്തികളുമായി ബന്ധപ്പെട്ട വകുപ്പുകളും എഫ്ഐആറിൽ ഉൾപ്പെടുത്തിയിട്ടുണ്ട്. പട്ടികജാതി-പട്ടികവർഗ അതിക്രമ നിരോധന നിയമത്തിലെ വ്യവസ്ഥകളും ചുമത്തിയിട്ടുണ്ട്.
അതേസമയം, സംഭവത്തെക്കുറിച്ച് കോൺഗ്രസും ബിജെപിയും തമ്മിലുള്ള രാഷ്ട്രീയ ഏറ്റുമുട്ടൽ കൂടുതൽ ശക്തമാകുകയാണ്. ഖർഗെയെ അപമാനിക്കുന്ന തരത്തിലുള്ള ജാതീയ വിവേചനമാണ് നടന്നതെന്നാണ് കോൺഗ്രസിന്റെ ആരോപണം. സംഭവത്തിന് ജാതിയുമായി ബന്ധമില്ലെന്നും കോൺഗ്രസ് വിഷയത്തെ രാഷ്ട്രീയമായി ഉപയോഗിക്കുകയാണെന്നുമാണ് ബിജെപിയുടെ നിലപാട്.
രാഹുൽ ഗാന്ധി തന്നെ ശുദ്ധീകരണ ചടങ്ങിനെതിരെ എഫ്ഐആർ ആവശ്യപ്പെട്ടതിന് പിന്നാലെ അദ്ദേഹത്തിനെതിരെ തന്നെ കേസ് രജിസ്റ്റർ ചെയ്തതാണ് ഇപ്പോൾ വിവാദത്തിന് പുതിയ രാഷ്ട്രീയ മാനം നൽകിയിരിക്കുന്നത്.