പോസ്റ്റ് ഓഫിസ് ജീവനക്കാർക്ക് 60 ദിവസത്തെ വേതനത്തിന് തുല്യമായ ബോണസ്; ആർക്കെല്ലാം ലഭിക്കും?

ന്യൂഡൽഹി:2025–26 അക്കൗണ്ടിങ് വർഷത്തേക്കുള്ള പ്രൊഡക്ടിവിറ്റി ലിങ്ക്ഡ് ബോണസ് അനുവദിച്ച് കേന്ദ്ര തപാൽ വകുപ്പ്. മൾട്ടി ടാസ്‌കിങ് സ്റ്റാഫ് (MTS), ഗ്രൂപ്പ് സി, ഗസറ്റഡ് അല്ലാത്ത ഗ്രൂപ്പ് ബി ജീവനക്കാർ എന്നിവർക്കാണ് 60 ദിവസത്തെ വേതനത്തിന് തുല്യമായ ബോണസ് അനുവദിച്ചിരിക്കുന്നത്. ഗ്രാമീൺ ഡാക് സേവകർക്ക് (GDS) എക്‌സ്‌ഗ്രേഷ്യ ബോണസും അർഹരായ മുഴുവൻസമയ കാഷ്വൽ ജീവനക്കാർക്കും താൽക്കാലിക ജീവനക്കാർക്കും പ്രത്യേക വ്യവസ്ഥകൾ പ്രകാരം ബോണസും ലഭിക്കും. 2026 ഒക്ടോബർ 16-ന് പുറത്തിറക്കിയ തപാൽ വകുപ്പിന്റെ ഉത്തരവിലാണ് ഇക്കാര്യം വ്യക്തമാക്കിയത്. സ്ഥിരം ജീവനക്കാർക്ക് എത്ര രൂപ ലഭിക്കും? ബോണസ് കണക്കാക്കുമ്പോൾ ജീവനക്കാരുടെ യഥാർഥ മാസവേതനം മുഴുവനായി പരിഗണിക്കില്ല. 2025 ഏപ്രിൽ 1 മുതൽ 2026 മാർച്ച് 31 വരെയുള്ള കാലയളവിലെ വേതനമാണ് കണക്കിന് ആധാരം. എന്നാൽ ഓരോ മാസത്തെയും അർഹമായ വേതനം പരമാവധി 7,000 രൂപയായി പരിമിതപ്പെടുത്തിയിട്ടുണ്ട്. ബോണസ് കണക്കാക്കാനുള്ള സൂത്രവാക്യം: ശരാശരി പ്രതിമാസ അർഹമായ വേതനം × 60 ÷ 30.4 ഇതനുസരിച്ച് ശരാശരി പ്രതിമാസ അർഹമായ വേതനം 7,000 രൂപയാണെങ്കിൽ ലഭിക്കുന്ന ബോണസ് ഏകദേശം 13,816 രൂപ ആയിരിക്കും. ഇത് പരമാവധി കണക്കാക്കാവുന്ന തുകയുടെ ഉദാഹരണമാണ്; എല്ലാ ജീവനക്കാർക്കും ഇതേ തുക ലഭിക്കണമെന്നില്ല. വേതനത്തിൽ അടിസ്ഥാന ശമ്പളം, ക്ഷാമബത്ത (DA), സ്പെഷൽ ബാങ്കിങ് അലവൻസ്, ഡെപ്യൂട്ടേഷൻ ഡ്യൂട്ടി അലവൻസ്, പരിശീലന സ്ഥാപനങ്ങളിലെ ഫാക്കൽറ്റി അംഗങ്ങൾക്കുള്ള പരിശീലന അലവൻസ് എന്നിവ ഉൾപ്പെടും. അസാധാരണ അവധി (EOL), ഡൈസ്-നോൺ കാലയളവുകൾ എന്നിവയുണ്ടെങ്കിൽ അതിനനുസരിച്ച് കണക്കിൽ കുറവുണ്ടാകും. ഗ്രാമീൺ ഡാക് സേവകർക്ക് ബോണസ് എങ്ങനെ? ഗ്രാമപ്രദേശങ്ങളിൽ തപാൽ സേവനങ്ങൾ നിർവഹിക്കുന്ന ഗ്രാമീൺ ഡാക് സേവകർക്ക് സാധാരണ ജീവനക്കാരുടേതിൽനിന്ന് വ്യത്യസ്തമായി എക്‌സ്‌ഗ്രേഷ്യ ബോണസാണ് അനുവദിച്ചിരിക്കുന്നത്. ഇവരുടെ ശരാശരി പ്രതിമാസ ടൈം റിലേറ്റഡ് കണ്ടിന്യൂയിറ്റി അലവൻസും (TRCA) അതിനുള്ള ക്ഷാമബത്തയും അടിസ്ഥാനമാക്കിയാണ് തുക കണക്കാക്കുക. 2025–26 അക്കൗണ്ടിങ് വർഷത്തിൽ ജോലി ചെയ്ത കാലയളവിനും ബാധകമായ വ്യവസ്ഥകൾക്കും അനുസരിച്ച് ബോണസ് തുകയിൽ വ്യത്യാസമുണ്ടാകും. കാഷ്വൽ ജീവനക്കാർക്കും ആനുകൂല്യം തപാൽ വകുപ്പിൽ ജോലി ചെയ്യുന്ന മുഴുവൻസമയ കാഷ്വൽ തൊഴിലാളികൾക്കും താൽക്കാലിക പദവിയിലുള്ള കാഷ്വൽ തൊഴിലാളികൾക്കും ആഡ്‌ഹോക്ക് ബോണസ് അനുവദിച്ചിട്ടുണ്ട്. 2026 മാർച്ച് 31-നകം തുടർച്ചയായി മൂന്ന് വർഷമോ അതിലധികമോ കാലം നിശ്ചിത നിബന്ധനകൾ പാലിച്ച് ജോലി ചെയ്തവർക്കാണ് ഇതിന് അർഹത. ദിവസവും എട്ടു മണിക്കൂർ ജോലി ചെയ്തിട്ടുള്ളവർക്ക് വർഷത്തിൽ കുറഞ്ഞത് 240 ദിവസത്തെ തൊഴിൽ പരിചയം വേണം. ആഴ്ചയിൽ അഞ്ചു ദിവസം മാത്രം പ്രവർത്തിക്കുന്ന ഓഫീസുകളിലെ ജീവനക്കാർക്ക് ഓരോ വർഷവും 206 പ്രവൃത്തിദിനങ്ങളാണ് മാനദണ്ഡം. ഇവരുടെ ബോണസ് കണക്കാക്കാൻ പ്രതിമാസം 1,200 രൂപ എന്ന സാങ്കൽപ്പിക വേതനമാണ് അടിസ്ഥാനമാക്കുന്നത്. എന്നാൽ യഥാർഥ വേതനം ഇതിലും കുറവായിരുന്ന മാസങ്ങളുണ്ടെങ്കിൽ അതും കണക്കിൽ പരിഗണിക്കണമെന്ന് ഉത്തരവിൽ വ്യക്തമാക്കുന്നു. വിരമിച്ചവർക്കും രാജിവെച്ചവർക്കും ലഭിക്കുമോ? 2025 ഏപ്രിൽ 1 മുതൽ 2026 മാർച്ച് 31 വരെയുള്ള കാലയളവിൽ വിരമിക്കുകയോ രാജിവെക്കുകയോ സർവീസിൽനിന്ന് പിരിയുകയോ തപാൽ വകുപ്പിനകത്തോ പുറത്തോ ഡെപ്യൂട്ടേഷനിൽ പ്രവേശിക്കുകയോ ചെയ്ത അർഹരായ സ്ഥിരം ജീവനക്കാർക്കും ചട്ടങ്ങൾക്കനുസരിച്ച് ബോണസിന് അർഹതയുണ്ടാകും. ജോലി ചെയ്ത കാലയളവ്, ലഭിച്ച വേതനം, ബാധകമായ മറ്റ് വ്യവസ്ഥകൾ എന്നിവ അനുസരിച്ചായിരിക്കും തുക നിശ്ചയിക്കുക. കേന്ദ്രത്തിന്റെ അംഗീകാരം കേന്ദ്ര ധനമന്ത്രിയുടെ അംഗീകാരത്തോടെയാണ് തപാൽ വകുപ്പിന്റെ ബോണസ് ഉത്തരവ് പുറത്തിറക്കിയത്. ബോണസ് വിതരണത്തിനുള്ള ചെലവ് 2026–27 സാമ്പത്തിക വർഷത്തിലെ അനുവദിച്ച ഫണ്ടിൽനിന്ന് വഹിക്കാനാണ് നിർദേശം. സ്ഥിരം തപാൽ ജീവനക്കാർ, ഗ്രാമീൺ ഡാക് സേവകർ, അർഹരായ കാഷ്വൽ തൊഴിലാളികൾ എന്നിങ്ങനെ വിവിധ വിഭാഗങ്ങൾക്ക് വ്യത്യസ്ത വ്യവസ്ഥകളിലാണ് ആനുകൂല്യം ലഭിക്കുക. അതിനാൽ ബോണസ് തുക എല്ലാവർക്കും ഒരുപോലെയായിരിക്കില്ല.