കൊച്ചി: മോട്ടോർ വാഹന വകുപ്പിന്റെ പരിവാഹൻ സൈറ്റിലുണ്ടായ സാങ്കേതിക തകരാറിനെ തുടർന്ന് കേരളത്തിന്റെ വിവിധ അതിർത്തി ചെക്ക്പോസ്റ്റുകളിൽ നൂറുകണക്കിന് വാഹനങ്ങൾ കുടുങ്ങി. ഇതര സംസ്ഥാനങ്ങളിലേക്ക് പോകുന്ന ടൂറിസ്റ്റ് വാഹനങ്ങൾക്ക് ആവശ്യമായ സ്പെഷ്യൽ പെർമിറ്റ് ഓൺലൈനായി ലഭിക്കാത്തതാണ് പ്രതിസന്ധിക്ക് കാരണം.
ശനിയാഴ്ച വൈകുന്നേരത്തോടെയാണ് പരിവാഹൻ സൈറ്റിൽ സാങ്കേതിക തകരാർ അനുഭവപ്പെട്ടത്. വാരാന്ത്യമായതിനാൽ തമിഴ്നാട്, കർണാടക തുടങ്ങിയ സംസ്ഥാനങ്ങളിലേക്ക് വിനോദയാത്രയ്ക്കായി പോയ ടൂറിസ്റ്റ് വാഹനങ്ങളാണ് പ്രധാനമായും പ്രതിസന്ധിയിലായത്. പെർമിറ്റ് ലഭിക്കാത്തതിനാൽ അതിർത്തി ചെക്ക്പോസ്റ്റുകളിൽ മണിക്കൂറുകളോളം കാത്തുനിൽക്കേണ്ട സാഹചര്യമാണ് യാത്രക്കാർക്ക് ഉണ്ടായത്.
മലപ്പുറം ജില്ലയിൽ മാത്രം വഴിക്കടവ് അതിർത്തിയിൽ ചെറുതും വലുതുമായ ഏകദേശം 500 വാഹനങ്ങൾ കുടുങ്ങിക്കിടക്കുന്നതായാണ് റിപ്പോർട്ട്. വാളയാർ ഉൾപ്പെടെ കേരളത്തിലെ മറ്റു അതിർത്തി ചെക്ക്പോസ്റ്റുകളിലും സമാനമായ സാഹചര്യമാണുള്ളത്. ആയിരക്കണക്കിന് യാത്രക്കാരെയാണ് ഇതിന്റെ ഭാഗമായി ബാധിച്ചിരിക്കുന്നത്.
മുൻകാലങ്ങളിൽ ചെക്ക്പോസ്റ്റുകളിൽ നിന്ന് താൽക്കാലിക പെർമിറ്റ് നേരിട്ട് ലഭ്യമാക്കാനുള്ള സംവിധാനം ഉണ്ടായിരുന്നെങ്കിലും ഇപ്പോൾ അത് ലഭ്യമല്ല. എല്ലാ നടപടികളും ഓൺലൈനിലേക്ക് മാറിയ സാഹചര്യത്തിൽ പരിവാഹൻ സൈറ്റിലെ തകരാർ യാത്രക്കാരുടെയും വാഹന ഉടമകളുടെയും യാത്ര തടസ്സപ്പെടുന്നതിലേക്ക് നയിക്കുകയായിരുന്നു.
പ്രശ്നം പരിഹരിക്കാൻ നടപടികൾ സ്വീകരിച്ചുവരികയാണെന്ന് മോട്ടോർ വാഹന വകുപ്പ് അറിയിച്ചിട്ടുണ്ട്. അതേസമയം, സാങ്കേതിക തകരാർ എത്രയും വേഗം പരിഹരിക്കണമെന്നും അടിയന്തരമായി ബദൽ പെർമിറ്റ് സംവിധാനം ഏർപ്പെടുത്തണമെന്നും വാഹന ഉടമകളും കോൺട്രാക്ട് കാര്യേജ് ഓപ്പറേറ്റർമാരും ആവശ്യപ്പെട്ടു.
പരിവാഹൻ സേവനം ഇടയ്ക്കിടെ തടസ്സപ്പെടുന്നത് യാത്രക്കാർക്ക് ബുദ്ധിമുട്ടുണ്ടാക്കുന്ന സാഹചര്യത്തിൽ സംസ്ഥാനത്ത് ബദൽ സംവിധാനമോ മിറർ സെർവറോ ഒരുക്കണമെന്ന ആവശ്യവും ഉയർന്നിട്ടുണ്ട്. വിഷയത്തിൽ കേന്ദ്ര ഗതാഗത മന്ത്രാലയവുമായി വീണ്ടും ബന്ധപ്പെടുമെന്ന് സംസ്ഥാന ഗതാഗത മന്ത്രി സി.പി. ജോൺ അറിയിച്ചതായും റിപ്പോർട്ടുകളുണ്ട്.