സോഹാർ: പശ്ചിമേഷ്യയിലെ സംഘർഷത്തിനിടെ ഒമാൻ തീരത്തോട് ചേർന്ന് വാണിജ്യക്കപ്പലുകൾക്കുനേരെ വീണ്ടും ആക്രമണം. ഡ്രോൺ ആക്രമണത്തിൽ എണ്ണ ടാങ്കറായ എംടി പെട്രോ ഡോൾഫിനിലെ രണ്ട് ഇന്ത്യൻ നാവികരെ കാണാതായി. കപ്പലിലുണ്ടായിരുന്ന മറ്റ് ഒമ്പത് ഇന്ത്യക്കാരെ സുരക്ഷിതമായി രക്ഷപ്പെടുത്തി.
ഒക്ടോബർ 11-ന് ഒമാനിലെ സോഹാർ തുറമുഖത്തിന് സമീപമുള്ള നങ്കൂരമിടൽ മേഖലയിലാണ് നിക്കരാഗ്വൻ പതാകയുള്ള എംടി പെട്രോ ഡോൾഫിന് നേരെ ഡ്രോൺ ആക്രമണമുണ്ടായത്. കപ്പലിൽ 11 ഇന്ത്യൻ നാവികരാണ് ഉണ്ടായിരുന്നത്. കാണാതായ രണ്ട് പേരെ കണ്ടെത്തുന്നതിനായി പ്രാദേശിക കോസ്റ്റ് ഗാർഡിന്റെ നേതൃത്വത്തിൽ തിരച്ചിലും രക്ഷാപ്രവർത്തനവും തുടരുകയാണ്.
കേന്ദ്ര തുറമുഖ, ഷിപ്പിങ്, ജലഗതാഗത മന്ത്രി സർബാനന്ദ സോനോവാളാണ് ഇക്കാര്യം അറിയിച്ചത്. കാണാതായ നാവികരെ കണ്ടെത്താൻ ബന്ധപ്പെട്ട അധികൃതരുമായി ഇന്ത്യൻ സർക്കാർ നിരന്തരം ഏകോപനം നടത്തുന്നുണ്ടെന്നും അദ്ദേഹം വ്യക്തമാക്കി.
മറ്റൊരു ടാങ്കറിനും നേരെ ആക്രമണം
അതേസമയം, എംടി പെട്രോ ഡോൾഫിൻ സംഭവത്തിന് പുറമെ എംടി വാൽതേര എന്ന മറ്റൊരു ടാങ്കറിനും നേരെ ആക്രമണമുണ്ടായി. മാർഷൽ ദ്വീപുകളുടെ പതാകയുള്ള ഈ കപ്പലിന് നേരെ ഹോർമുസ് കടലിടുക്ക് മേഖലയിലാണ് അജ്ഞാതമായ ഒരു പ്രോജക്ടൈൽ പതിച്ചത്. തുടർന്ന് കപ്പലിൽ തീപിടിത്തമുണ്ടായെങ്കിലും അതിലുണ്ടായിരുന്ന 11 ഇന്ത്യൻ നാവികരും സുരക്ഷിതരാണെന്നാണ് ഔദ്യോഗിക വിവരം.
ആശങ്ക അറിയിച്ച് ഇന്ത്യ
വാണിജ്യക്കപ്പലുകൾക്കുനേരെ ആവർത്തിച്ചുണ്ടാകുന്ന ആക്രമണങ്ങളിൽ ഇന്ത്യ കടുത്ത ആശങ്ക രേഖപ്പെടുത്തി. ഇന്ത്യൻ നാവികരുടെ സുരക്ഷ ഉറപ്പാക്കുന്നതിനായി ഒമാനിലെ ഇന്ത്യൻ എംബസി ബന്ധപ്പെട്ട അധികൃതരുമായും കപ്പൽ മാനേജ്‌മെന്റ് കമ്പനികളുമായും നിരന്തരം ബന്ധപ്പെടുന്നുണ്ട്.
വാണിജ്യക്കപ്പലുകൾക്കും നാവികർക്കും സാധാരണക്കാരുടെ അടിസ്ഥാനസൗകര്യങ്ങൾക്കും നേരെയുള്ള ആക്രമണങ്ങൾ അവസാനിപ്പിക്കണമെന്ന് വിദേശകാര്യ മന്ത്രാലയം ആവശ്യപ്പെട്ടു. പശ്ചിമേഷ്യയിലെ സംഘർഷം കുറയ്ക്കാനും ചർച്ചകളിലൂടെയും നയതന്ത്രത്തിലൂടെയും പ്രശ്നങ്ങൾക്ക് പരിഹാരം കാണാനും ഇന്ത്യ ആഹ്വാനം ചെയ്തു.
അന്താരാഷ്ട്ര സമുദ്രപാതകളിലൂടെയുള്ള സുരക്ഷിതവും തടസ്സരഹിതവുമായ കപ്പൽഗതാഗതം ഉറപ്പാക്കേണ്ടതിന്റെ ആവശ്യകതയും ഇന്ത്യ ആവർത്തിച്ചു.
പശ്ചിമേഷ്യയിലെ സംഘർഷം രൂക്ഷമായ സാഹചര്യത്തിൽ ഗൾഫ് മേഖലയിലൂടെയുള്ള വാണിജ്യക്കപ്പൽ ഗതാഗതത്തിന്റെ സുരക്ഷ സംബന്ധിച്ച ആശങ്കകൾ വർധിക്കുകയാണ്. കടൽമാർഗമുള്ള എണ്ണനീക്കത്തിനും അന്താരാഷ്ട്ര വ്യാപാരത്തിനും നിർണായകമായ മേഖലയിലെ തുടർച്ചയായ ആക്രമണങ്ങൾ ഇന്ത്യൻ നാവികരുടെ സുരക്ഷയ്ക്കും വെല്ലുവിളിയാകുന്നു.