തിരുവനന്തപുരം: നേപ്പാളിലുണ്ടായ ശക്തമായ മിന്നൽപ്രളയത്തെ തുടർന്ന് കുട്ടികൾ ഉൾപ്പെടെ 53 മലയാളികൾ വിവിധ പ്രദേശങ്ങളിൽ കുടുങ്ങിക്കിടക്കുന്നതായി നോർക്ക റൂട്ട്സ് അറിയിച്ചു. ഇവരുടെ ഫോൺ നമ്പറുകൾ നോർക്കയുടെ കൈവശമുണ്ടെങ്കിലും പ്രളയബാധിത മേഖലകളിലെ നെറ്റ്‌വർക്ക് സംവിധാനങ്ങൾ തകരാറിലായതിനാൽ നേരിട്ട് ബന്ധപ്പെടാൻ ഇതുവരെ സാധിച്ചിട്ടില്ല. എന്നാൽ ലഭ്യമായ വിവരങ്ങളുടെ അടിസ്ഥാനത്തിൽ ഇവർ സുരക്ഷിതരാണെന്നാണ് നോർക്കയുടെ വിലയിരുത്തൽ. മുഖ്യമന്ത്രിയുടെ ഓഫീസും ചീഫ് സെക്രട്ടറിയുടെ ഓഫീസും വഴി ലഭിച്ച വിവരങ്ങൾ ഏകീകരിച്ചാണ് നേപ്പാളിൽ കുടുങ്ങിയ മലയാളികളുടെ പട്ടിക തയ്യാറാക്കിയത്. കുടുംബാംഗങ്ങളും മുതിർന്നവരും കുട്ടികളും ഉൾപ്പെടെ 53 പേരെ നിലവിൽ തിരിച്ചറിഞ്ഞിട്ടുണ്ട്. ഇവരുടെ അവസാനമായി അറിയപ്പെട്ടിരുന്ന സ്ഥലങ്ങൾ കണ്ടെത്തുന്നതിനും കൂടുതൽ വിവരങ്ങൾ ശേഖരിക്കുന്നതിനുമുള്ള ശ്രമങ്ങൾ തുടരുകയാണ്. അതേസമയം കാസർകോട് കാഞ്ഞങ്ങാട് നിന്നുള്ള 36 അംഗ സംഘവും കോട്ടയം സ്വദേശികളായ 16 അംഗ സംഘവും സുരക്ഷിതരാണെന്ന് നോർക്ക അറിയിച്ചു. ഇവരുമായി നേരിട്ട് ബന്ധപ്പെടാൻ കഴിഞ്ഞിട്ടുണ്ട്. നേപ്പാളിലെ മറ്റ് പ്രദേശങ്ങളിലേക്കായിരുന്നു ഈ സംഘങ്ങളുടെ യാത്ര. നേപ്പാളിൽ കുടുങ്ങിയ മലയാളികളുടെ രക്ഷാപ്രവർത്തനങ്ങൾ ഏകോപിപ്പിക്കുന്നതിനായി ഡൽഹിയിലെ നോർക്ക റൂട്ട്സ് എൻആർകെ ഡെവലപ്മെന്റ് ഓഫീസറും ഇടപെടുന്നുണ്ട്. റെസിഡന്റ് കമ്മിഷണറുടെ ഓഫീസുമായി ബന്ധപ്പെട്ട് ലഭിക്കുന്ന വിവരങ്ങൾ ഇന്ത്യൻ എംബസിക്ക് കൈമാറുന്നുണ്ട്. അവസാന ലൊക്കേഷൻ കണ്ടെത്താൻ ശ്രമം കുടുങ്ങിയവരുടെ അവസാനമായി അറിയപ്പെട്ട ലൊക്കേഷൻ കണ്ടെത്തുകയാണ് ഇപ്പോഴത്തെ പ്രധാന ലക്ഷ്യം. ഇവർ അവസാനമായി വിളിച്ചിട്ടുണ്ടോ, ഏത് പ്രദേശത്തേക്കാണ് പോകുന്നതായി അറിയിച്ചിരുന്നത് തുടങ്ങിയ വിവരങ്ങൾ കുടുംബാംഗങ്ങളിൽ നിന്ന് ശേഖരിച്ച് ബന്ധപ്പെട്ട അധികൃതർക്ക് കൈമാറിയിട്ടുണ്ട്. അവസാന ലൊക്കേഷൻ സ്ഥിരീകരിക്കാൻ കഴിഞ്ഞാൽ നേരിട്ടുള്ള ബന്ധം സാധ്യമാക്കാനാകുമെന്നാണ് പ്രതീക്ഷ. അതേസമയം, നേപ്പാളിലെ പ്രളയബാധിത പ്രദേശങ്ങളിലുള്ള മലയാളികൾക്ക് അടിയന്തര സഹായം ലഭ്യമാക്കുന്നതിനായി നോർക്ക ഹെൽപ്പ് ഡെസ്കും പ്രവർത്തിക്കുന്നുണ്ട്. നോർക്ക ഗ്ലോബൽ കോൺടാക്ട് സെന്ററിന്റെ 1800 425 3939 എന്ന ടോൾ ഫ്രീ നമ്പറിലും 0091 8802 012345 എന്ന അന്താരാഷ്ട്ര മിസ്ഡ് കോൾ നമ്പറിലും ബന്ധപ്പെടാം. ഇന്ത്യൻ പൗരന്മാർക്കായി നേപ്പാളിലെ ഇന്ത്യൻ എംബസിയും പ്രത്യേക ഹെൽപ്പ് ലൈൻ നമ്പറുകൾ തുറന്നിട്ടുണ്ട്. +977 985 131 6807, +977 970 910 7500 എന്നീ നമ്പറുകളിലാണ് അടിയന്തര സഹായത്തിനായി ബന്ധപ്പെടേണ്ടത്. നേപ്പാളിലെ ദുരന്തബാധിത പ്രദേശങ്ങളിൽ രക്ഷാപ്രവർത്തനങ്ങളും വിവരശേഖരണവും തുടരുകയാണ്. ഔദ്യോഗികമായി സ്ഥിരീകരിക്കാത്ത വിവരങ്ങളിൽ ആശ്രയിക്കാതെ, ലഭിക്കുന്ന ഓരോ വിവരവും പരിശോധിച്ച ശേഷമാണ് മലയാളികളുടെ സുരക്ഷ സംബന്ധിച്ച സ്ഥിതിഗതികൾ നോർക്ക വിലയിരുത്തുന്നത്.
സമകാലികം