കണ്ണൂർ: എഴുത്ത് തന്റെ ജീവിതരീതിയായി മാറിയെന്നും 60 പുസ്തകങ്ങൾ എഴുതാൻ കഴിഞ്ഞതിൽ ഏറെ സന്തോഷമുണ്ടെന്നും എഴുത്തുകാരൻ എം. മുകുന്ദൻ. 84 വയസ്സ് പൂർത്തിയാകുന്ന വേളയിലും എഴുത്തുകാരൻ എന്ന നിലയിൽ തനിക്ക് എന്നും ആഹ്ലാദം മാത്രമാണ് ഉണ്ടായിട്ടുള്ളതെന്നും അദ്ദേഹം പറഞ്ഞു.
ശതാഭിഷിക്തനാകുന്ന എം. മുകുന്ദന് മലയാള മനോരമ സംഘടിപ്പിച്ച ആദരവ് പരിപാടിയുടെ ഭാഗമായി നടന്ന മുഖാമുഖത്തിലാണ് അദ്ദേഹം ഇക്കാര്യം പറഞ്ഞത്. എഴുത്തുകാരൻ സന്തോഷ് ഏച്ചിക്കാനവുമായി നടത്തിയ സ്‌നേഹ ഭാഷണത്തിലാണ് മുകുന്ദൻ തന്റെ എഴുത്തുജീവിതത്തിലെ അനുഭവങ്ങളും നിലപാടുകളും പങ്കുവച്ചത്.
ഫ്രഞ്ച് എംബസിയിൽ ജോലി ചെയ്തിരുന്ന കാലത്ത് ദിവസവും 12 മണിക്കൂറോളം ജോലി ചെയ്യേണ്ടിവന്നിരുന്നെങ്കിലും ഏകാന്തത തനിക്കുണ്ടായിരുന്നുവെന്നും അത് എഴുത്തിന് ഏറെ ആവശ്യമായിരുന്നുവെന്നും മുകുന്ദൻ പറഞ്ഞു. എന്നാൽ കേരളത്തിലേക്ക് തിരിച്ചെത്തിയപ്പോൾ തനിക്ക് നഷ്ടപ്പെട്ടത് ആ ഏകാന്തതയാണെന്നും അദ്ദേഹം ചൂണ്ടിക്കാട്ടി.
“കേരളത്തിലിരുന്ന് എഴുതിയ ഏക കൃതി ‘ഒടുവിൽ വന്ന ഏയ്ഞ്ചൽ മേരി’യാണ്.”
കേരളത്തിലെ ജീവിതത്തിൽ ആൾക്കൂട്ടം ഏറെയാണെന്നും അത് എഴുത്തിന് ഗുണകരമല്ലെന്നും മുകുന്ദൻ അഭിപ്രായപ്പെട്ടു. ആൾക്കൂട്ടം ഫാഷിസം വ്യാപിക്കാനുള്ള ഒരു വഴിയാണെന്നും അദ്ദേഹം പറഞ്ഞു.
എഴുത്തുകാരനെന്ന നിലയിൽ തന്റെ ദീർഘകാല യാത്രയിൽ 60 പുസ്തകങ്ങൾ പൂർത്തിയാക്കാൻ കഴിഞ്ഞതിലുള്ള സന്തോഷവും മുകുന്ദൻ പങ്കുവച്ചു. ജീവിതത്തെയും എഴുത്തിനെയും വേർതിരിച്ചുകാണാനാകാത്ത അനുഭവമാണ് തന്റെതെന്നും അദ്ദേഹം വ്യക്തമാക്കി.മലയാള മനോരമയുടെ നേതൃത്വത്തിൽ കണ്ണൂരിൽ നടന്ന പരിപാടിയിലാണ് എം. മുകുന്ദനെ ആദരിച്ചത്.