തിരുവനന്തപുരം: വിദ്യാർഥികൾക്ക് പഠനത്തോടൊപ്പം വിനോദവും പ്രായോഗിക അറിവും ലഭ്യമാക്കാൻ കുറഞ്ഞ ചെലവിൽ പ്രത്യേക വിനോദയാത്രാ പാക്കേജുമായി കെഎസ്ആർടിസി. ‘വിജ്ഞാന ദർശിനി’ എന്ന പേരിൽ ആരംഭിക്കുന്ന പദ്ധതിയിലൂടെ സ്കൂൾ, കോളജ് വിദ്യാർഥികൾക്ക് സാംസ്കാരിക കേന്ദ്രങ്ങൾ, ചരിത്രസ്മാരകങ്ങൾ, വ്യവസായ സ്ഥാപനങ്ങൾ, പ്രകൃതിരമണീയമായ വിനോദസഞ്ചാര കേന്ദ്രങ്ങൾ എന്നിവ സന്ദർശിക്കാം.
ഗതാഗത വകുപ്പ് മന്ത്രിയുടെ പ്രത്യേക നിർദേശപ്രകാരം കെഎസ്ആർടിസി ബജറ്റ് ടൂറിസം സെല്ലിന്റെ നേതൃത്വത്തിലാണ് പദ്ധതി നടപ്പാക്കുന്നത്. വിനോദയാത്രകൾക്കപ്പുറം വിദ്യാർഥികളുടെ പഠനാനുഭവങ്ങൾ വിപുലീകരിക്കുകയും പാഠപുസ്തകങ്ങളിൽനിന്ന് ലഭിക്കുന്ന അറിവുകൾ നേരിട്ടുള്ള അനുഭവങ്ങളിലൂടെ കൂടുതൽ വ്യക്തതയോടെ മനസ്സിലാക്കാൻ അവസരമൊരുക്കുകയുമാണ് ലക്ഷ്യം.
പൊന്മുടി ഉൾപ്പെടെ വിവിധ കേന്ദ്രങ്ങളിലേക്ക് യാത്ര
പദ്ധതിയുടെ ആദ്യഘട്ടത്തിൽ തിരുവനന്തപുരം ജില്ലയിലെ പ്രധാന വിനോദസഞ്ചാര കേന്ദ്രമായ പൊന്മുടിയിലേക്കും സമീപപ്രദേശങ്ങളിലെ വിവിധ ആകർഷണീയ കേന്ദ്രങ്ങളിലേക്കുമാണ് യാത്രാ പാക്കേജുകൾ ഒരുക്കിയിരിക്കുന്നത്.
കാപ്പുകാട് ആനവളർത്തൽ കേന്ദ്രം, നെയ്യാർ ഡാം, പാലോട് ബൊട്ടാണിക്കൽ ഗാർഡൻ, വിതുരയിലെ ജേഴ്‌സി ഫാം, മ്യൂസിയം, പ്ലാനറ്റേറിയം തുടങ്ങിയ കേന്ദ്രങ്ങളും യാത്രാപദ്ധതിയിൽ ഉൾപ്പെടുത്തിയിട്ടുണ്ട്.
പ്രകൃതി, ശാസ്ത്രം, ചരിത്രം, ജൈവവൈവിധ്യം, മൃഗസംരക്ഷണം തുടങ്ങിയ മേഖലകളെ അടുത്തറിയാൻ വിദ്യാർഥികൾക്ക് ഇത്തരം യാത്രകൾ സഹായകമാകും. ക്ലാസ് മുറികളിലെ പഠനത്തെ നേരിട്ടുള്ള അനുഭവങ്ങളുമായി ബന്ധിപ്പിക്കാനും ഇതിലൂടെ സാധിക്കും.
പൊന്മുടിയിലേക്കുള്ള യാത്രകൾക്കായി അനുയോജ്യമായ പ്രത്യേക കെഎസ്ആർടിസി ബസുകളാണ് ഉപയോഗിക്കുക. ബജറ്റ് ടൂറിസം സെല്ലിന്റെ പ്രത്യേക ബസുകളിൽ ഒരേസമയം 36 വിദ്യാർഥികൾക്ക് യാത്ര ചെയ്യാനുള്ള സൗകര്യമുണ്ട്.
വ്യവസായ സന്ദർശനങ്ങൾക്കും അവസരം
വിദ്യാഭ്യാസ സ്ഥാപനങ്ങളുടെ ആവശ്യങ്ങൾക്കനുസരിച്ച് യാത്രകൾ ക്രമീകരിക്കാനും ഇൻഡസ്ട്രിയൽ വിസിറ്റ് ഉൾപ്പെടെയുള്ള സൗകര്യങ്ങൾ ഒരുക്കാനും കെഎസ്ആർടിസി നടപടി സ്വീകരിച്ചിട്ടുണ്ട്. മറ്റ് ജില്ലകളിലും പദ്ധതി നടപ്പാക്കുന്നതിനുള്ള ക്രമീകരണങ്ങൾ പുരോഗമിക്കുകയാണ്.
പഠനവിഷയങ്ങളുമായി ബന്ധപ്പെട്ട സ്ഥാപനങ്ങളും കേന്ദ്രങ്ങളും നേരിട്ട് സന്ദർശിക്കുന്നതിലൂടെ വിദ്യാർഥികൾക്ക് തൊഴിൽമേഖലകളെക്കുറിച്ചും ഉൽപ്പാദനപ്രക്രിയകളെക്കുറിച്ചും കൂടുതൽ മനസ്സിലാക്കാൻ അവസരം ലഭിക്കും. സ്കൂളുകൾക്കും കോളജുകൾക്കും അവരുടെ പഠനപരിപാടികൾക്ക് അനുയോജ്യമായ രീതിയിൽ യാത്രകൾ ആസൂത്രണം ചെയ്യാനാകുമെന്നതും പദ്ധതിയുടെ പ്രത്യേകതയാണ്.
ജില്ലാ കോ-ഓർഡിനേറ്റർമാരെ ബന്ധപ്പെടാം
യാത്രാ പാക്കേജുകൾ, ക്രമീകരണങ്ങൾ, മറ്റ് വിവരങ്ങൾ എന്നിവ അറിയാൻ അതത് ജില്ലകളിലെ കെഎസ്ആർടിസി ബജറ്റ് ടൂറിസം സെൽ ജില്ലാ കോ-ഓർഡിനേറ്റർമാരെ ബന്ധപ്പെടാം.
ജില്ല തിരിച്ചുള്ള ബന്ധപ്പെടേണ്ട നമ്പറുകൾ:
- തിരുവനന്തപുരം നോർത്ത്: 9188619378
- തിരുവനന്തപുരം സൗത്ത്: 9188938522
- കൊല്ലം: 9188938523
- പത്തനംതിട്ട: 9188938524
- ആലപ്പുഴ: 9188938525
- കോട്ടയം: 9188938526
- ഇടുക്കി: 9188938527
- എറണാകുളം: 9188938528
- തൃശ്ശൂർ: 9188938529
- പാലക്കാട്: 9188938530
- മലപ്പുറം: 9188938531
- കോഴിക്കോട്: 9188938532
- വയനാട്: 9188938533
- കണ്ണൂർ, കാസർകോട്: 9188938534
വിദ്യാഭ്യാസവും വിനോദവും സമന്വയിപ്പിക്കുന്ന ‘വിജ്ഞാന ദർശിനി’ പദ്ധതി വിദ്യാർഥികൾക്ക് പുതിയ അനുഭവങ്ങൾ നേടാനും പഠനത്തെ കൂടുതൽ ആസ്വാദ്യകരമാക്കാനും സഹായിക്കുമെന്നാണ് പ്രതീക്ഷ. കുറഞ്ഞ ചെലവിൽ പഠനയാത്രകൾ സംഘടിപ്പിക്കാൻ ആഗ്രഹിക്കുന്ന വിദ്യാഭ്യാസ സ്ഥാപനങ്ങൾക്ക് ഈ പദ്ധതി പ്രയോജനപ്പെടുത്താം.