.തിരുവനന്തപുരം: കെഎസ്ആർടിസി ബസ് യാത്ര കൂടുതൽ സൗഹൃദപരമാക്കാൻ ബസുകളിൽ ഡിജിറ്റൽ റേഡിയോ ശൃംഖല ഒരുക്കുന്നു. പ്രതിദിനം യാത്ര ചെയ്യുന്ന ഏകദേശം 21 ലക്ഷം യാത്രക്കാർക്ക് സംഗീതം, കാലാവസ്ഥാ വിവരങ്ങൾ, യാത്രാ നിർദേശങ്ങൾ, പൊതുജന ബോധവത്കരണ സന്ദേശങ്ങൾ എന്നിവ കേൾക്കാൻ കഴിയുന്ന സംവിധാനമാണ് ഒരുങ്ങുന്നത്.
പ്രിയദർശിനി സൗജന്യ യാത്രാ പദ്ധതി ആരംഭിച്ചതിന് പിന്നാലെ കെഎസ്ആർടിസിയിലെ യാത്രക്കാരുടെ എണ്ണത്തിലുണ്ടായ വർധനയാണ് യാത്രാനുഭവം മെച്ചപ്പെടുത്താനുള്ള പുതിയ പദ്ധതിക്ക് പിന്നിൽ. ഗതാഗത മന്ത്രി സി.പി. ജോണിന്റെ നേതൃത്വത്തിലാണ് ഡിജിറ്റൽ റേഡിയോ പദ്ധതി നടപ്പാക്കുന്നത്.
പരസ്യവരുമാനത്തിലൂടെ പദ്ധതി; യാത്രക്കാർക്ക് അധിക ചെലവില്ല
പദ്ധതിക്കായി പൊതുജനങ്ങളിൽനിന്ന് അധിക തുക ഈടാക്കില്ല. സ്വകാര്യ പങ്കാളിത്തത്തിലൂടെയുള്ള പരസ്യവരുമാനം ഉപയോഗിച്ചാണ് ഡിജിറ്റൽ റേഡിയോ സംവിധാനം പ്രവർത്തിപ്പിക്കുക. നിലവിൽ സർവീസ് നടത്തുന്ന ഏകദേശം 5,700 കെഎസ്ആർടിസി ബസുകളിലേക്കും സംവിധാനം വ്യാപിപ്പിക്കാനാണ് ലക്ഷ്യമിടുന്നത്.
രാവിലെ 6 മുതൽ രാത്രി 9 വരെ മാത്രമായിരിക്കും റേഡിയോ സേവനം. ശബ്ദം യാത്രക്കാർക്ക് ബുദ്ധിമുട്ടുണ്ടാകാത്ത വിധം നിയന്ത്രിക്കുന്ന സംവിധാനവും ഉണ്ടാകും. രാഷ്ട്രീയമോ മതപരമോ ആയ ഉള്ളടക്കങ്ങൾ സംപ്രേഷണം ചെയ്യില്ല. ഓരോ മണിക്കൂറിലും പരമാവധി അഞ്ച് മിനിറ്റ് ഔദ്യോഗിക യാത്രാ അറിയിപ്പുകൾക്കും പൊതുജനക്ഷേമ വിവരങ്ങൾക്കുമായി മാറ്റിവയ്ക്കും.
നെറ്റ്‌വർക്ക് ഇല്ലാത്ത സ്ഥലങ്ങളിലും സംഗീതം മുടങ്ങില്ല
കേരളത്തിന്റെ ഭൂപ്രകൃതിക്ക് അനുയോജ്യമായ രീതിയിലാണ് സാങ്കേതിക സംവിധാനം വികസിപ്പിക്കുന്നത്. മൊബൈൽ നെറ്റ്‌വർക്ക് ലഭ്യമല്ലാത്ത വനമേഖലകളിലൂടെയോ ഗ്രാമീണ പ്രദേശങ്ങളിലൂടെയോ ബസ് സഞ്ചരിക്കുമ്പോഴും സംഗീതവും മറ്റ് പരിപാടികളും മുടങ്ങാതിരിക്കാൻ പ്ലേലിസ്റ്റുകൾ വാഹനത്തിലെ സംവിധാനത്തിൽ നേരത്തെ സംഭരിക്കുന്ന രീതിയാണ് പരിഗണിക്കുന്നത്.
അടിയന്തര സാഹചര്യങ്ങളിൽ സാധാരണ പരിപാടികൾക്കിടയിലും സുരക്ഷാ നിർദേശങ്ങൾ ഉടൻ യാത്രക്കാരിലെത്തിക്കാനും സംവിധാനത്തിലൂടെ കഴിയും.
തിരഞ്ഞെടുത്ത റൂട്ടുകളിൽ ടിവി സ്ക്രീനുകളും
ഭാവിയിൽ തിരഞ്ഞെടുത്ത കെഎസ്ആർടിസി റൂട്ടുകളിൽ മൾട്ടിമീഡിയ ടെലിവിഷൻ സ്ക്രീനുകൾ സ്ഥാപിക്കുന്നതും പരിഗണനയിലുണ്ട്. ഇതോടെ സംഗീതവും വിവരങ്ങളും മാത്രമല്ല, ദൃശ്യ ഉള്ളടക്കങ്ങളും യാത്രക്കാർക്ക് ലഭ്യമാകുന്ന തരത്തിൽ കെഎസ്ആർടിസി യാത്രാനുഭവം കൂടുതൽ ഡിജിറ്റലാകുമെന്നാണ് പദ്ധതി.
പ്രിയദർശിനിക്ക് പിന്നാലെ യാത്രക്കാരുടെ എണ്ണം ഉയർന്നു
ജൂൺ 15ന് ആരംഭിച്ച പ്രിയദർശിനി സൗജന്യ യാത്രാ പദ്ധതിക്ക് ശേഷം സ്ത്രീ യാത്രക്കാരുടെ എണ്ണത്തിൽ വർധനയുണ്ടായതായി റിപ്പോർട്ടിൽ പറയുന്നു. ആദ്യ ആഴ്ചയിലെ 11.08 ലക്ഷം സ്ത്രീ യാത്രക്കാരിൽനിന്ന് 13-ാം ആഴ്ചയിൽ എണ്ണം 13.93 ലക്ഷമായി, 25.7 ശതമാനം വർധന രേഖപ്പെടുത്തി.
ഓർഡിനറി ബസ് യാത്രക്കാരിൽ സ്ത്രീകളും ട്രാൻസ്ജെൻഡർ യാത്രക്കാരും ചേർന്ന് 60 ശതമാനത്തിലധികമായി. ഇതോടെ കെഎസ്ആർടിസിയുടെ വിവിധ സർവീസുകളിലായി പ്രതിദിന യാത്രക്കാരുടെ എണ്ണം 27 ലക്ഷത്തിന് മുകളിലെത്തി എന്നാണ് റിപ്പോർട്ട്.