.jpeg)
തിരുവനന്തപുരം: മുല്ലപ്പെരിയാർ അണക്കെട്ടിലെ ജലനിരപ്പ് ഉയർത്താനുള്ള തമിഴ്നാട് സർക്കാരിന്റെ നീക്കത്തിനെതിരെ കേരളം ശക്തമായ പ്രതിഷേധവുമായി രംഗത്ത്. തമിഴ്നാടിന്റെ ബജറ്റ് പ്രഖ്യാപനത്തിന്റെ പശ്ചാത്തലത്തിൽ ഔദ്യോഗികമായി പ്രതിഷേധം അറിയിക്കുമെന്നും ആവശ്യമെങ്കിൽ കോടതിയെ സമീപിക്കുന്നതടക്കമുള്ള നിയമനടപടികൾ സ്വീകരിക്കുമെന്നും ജലവിഭവ വകുപ്പ് മന്ത്രി മോൻസ് ജോസഫ് വ്യക്തമാക്കി.
മുല്ലപ്പെരിയാറിലെ ജലനിരപ്പ് ഒരു സാഹചര്യത്തിലും ഉയർത്താൻ അനുവദിക്കില്ലെന്നതാണ് കേരളത്തിന്റെ നിലപാടെന്ന് മന്ത്രി പറഞ്ഞു. അണക്കെട്ടിന്റെ സുരക്ഷയ്ക്കാണ് കേരളം പരമപ്രാധാന്യം നൽകുന്നത്. ജലനിരപ്പ് 142 അടിയായി നിലനിർത്തണമെന്ന നിലപാടിൽ മാറ്റമില്ലെന്നും മന്ത്രി വ്യക്തമാക്കി.
തമിഴ്നാടിന്റെ പ്രഖ്യാപനത്തെ തുടർന്ന് ജലവിഭവ വകുപ്പിലെ ഉന്നത ഉദ്യോഗസ്ഥരുടെ അടിയന്തര യോഗം ചേർന്ന് സ്ഥിതിഗതികൾ വിലയിരുത്തി. വിഷയത്തിൽ തുടർനടപടികൾ സംബന്ധിച്ചും സർക്കാർ തലത്തിൽ ചർച്ചകൾ നടക്കുകയാണ്.
മുല്ലപ്പെരിയാറിൽ പുതിയ അണക്കെട്ട് നിർമിക്കണമെന്നതാണ് കേരളത്തിന്റെ അടിസ്ഥാന നിലപാടെന്നും മന്ത്രി ആവർത്തിച്ചു. കേരളത്തിലെ ജനങ്ങളുടെ സുരക്ഷ ഉറപ്പാക്കുന്നതിനൊപ്പം തമിഴ്നാടിന് ആവശ്യമായ ജലം ലഭ്യമാക്കുന്ന തരത്തിലുള്ള സമവായപരമായ പരിഹാരമാണ് കേരളം മുന്നോട്ടുവയ്ക്കുന്നതെന്നും അദ്ദേഹം പറഞ്ഞു.
അണക്കെട്ടിന്റെ സുരക്ഷ സംബന്ധിച്ച ആശങ്കകൾക്കിടെയാണ് ജലനിരപ്പ് ഉയർത്താനുള്ള നീക്കം. 131 വർഷത്തോളം പഴക്കമുള്ള അണക്കെട്ടിന്റെ സമഗ്ര സുരക്ഷാ വിലയിരുത്തലുമായി ബന്ധപ്പെട്ട നടപടികളും നിർണായകമാണ്. സുപ്രീം കോടതി നിർദേശങ്ങളുടെ പശ്ചാത്തലത്തിൽ സുരക്ഷാ പരിശോധന ഉൾപ്പെടെയുള്ള നടപടികൾ സമയബന്ധിതമായി പൂർത്തിയാക്കേണ്ടതുണ്ടെന്നും കേരളം ചൂണ്ടിക്കാട്ടുന്നു.
അതേസമയം, മുല്ലപ്പെരിയാർ അണക്കെട്ടിന്റെ സമഗ്ര സുരക്ഷാ വിലയിരുത്തലിനായി കേന്ദ്ര ജലശക്തി മന്ത്രാലയത്തിന് കീഴിൽ രൂപീകരിച്ച സ്വതന്ത്ര വിദഗ്ധ സമിതിയിൽ കേരളത്തിന്റെ പ്രതിനിധിയെ ഉൾപ്പെടുത്തുന്നതിനുള്ള നടപടികളും പുരോഗമിക്കുകയാണ്. കേരളത്തിന്റെ മുൻ പ്രതിനിധിയെ മാറ്റിയതിനെതിരെ സംസ്ഥാനം ശക്തമായ പ്രതിഷേധം അറിയിച്ചതിന് പിന്നാലെ പുതിയ വിദഗ്ധനെ നാമനിർദേശം ചെയ്യാൻ കേന്ദ്രം കേരളത്തോട് ആവശ്യപ്പെട്ടിരുന്നു.
മുല്ലപ്പെരിയാർ വിഷയത്തിൽ കേരളത്തിന്റെ സുരക്ഷാ ആശങ്കകൾ അവഗണിച്ച് ഏകപക്ഷീയമായ തീരുമാനങ്ങൾ അംഗീകരിക്കാനാകില്ലെന്ന നിലപാടിലാണ് സംസ്ഥാന സർക്കാർ. വിഷയത്തിൽ തമിഴ്നാടിനും കേന്ദ്ര സർക്കാരിനും ഔദ്യോഗികമായി നിലപാട് അറിയിക്കുന്നതിനൊപ്പം ആവശ്യമായ നിയമനടപടികളും സ്വീകരിക്കുമെന്ന് മന്ത്രി വ്യക്തമാക്കി.