കൊച്ചി: സംസ്ഥാനത്തെ രൂക്ഷമായ വൈദ്യുതി പ്രതിസന്ധിയെ മറികടക്കുന്നതിനായി സമഗ്രമായ പുതിയ വൈദ്യുതി നയം ഒക്ടോബറിൽ പുറത്തിറക്കുമെന്ന് മുഖ്യമന്ത്രി വി.ഡി. സതീശൻ. നിലവിലെ പ്രതിസന്ധിയെ തടസ്സമായി കാണാതെ, സംസ്ഥാനത്തിന്റെ ദീർഘകാല ഊർജ ആവശ്യങ്ങൾ പരിഹരിക്കുന്ന പുതിയ വൈദ്യുതി നയവും ഊർജ മാനേജ്മെന്റ് സംവിധാനവും രൂപപ്പെടുത്താനുള്ള അവസരമായി കാണുകയാണെന്നും മുഖ്യമന്ത്രി പറഞ്ഞു.
കൊച്ചി ജവഹർലാൽ നെഹ്‌റു സ്റ്റേഡിയത്തിൽ നടന്ന ‘കോർ റിന്യൂ എക്‌സ്‌പോ ആൻഡ് എനർജി കോൺക്ലേവ് 2026’ ഉദ്ഘാടനം ചെയ്യുകയായിരുന്നു അദ്ദേഹം.
കഴിഞ്ഞ വർഷം സെപ്റ്റംബറിൽ സംസ്ഥാനത്തെ വൈദ്യുതി ഉപഭോഗം 4,445 മെഗാവാട്ടായിരുന്നെങ്കിൽ ഇത്തവണ ഇത് 920 മെഗാവാട്ട് വർധിച്ചതായി മുഖ്യമന്ത്രി ചൂണ്ടിക്കാട്ടി. കേരളത്തിന്റെ നിലവിലെ വൈദ്യുതി ആവശ്യകതയുടെ 15 ശതമാനം മാത്രമാണ് സംസ്ഥാനത്തിനകത്ത് ഉൽപ്പാദിപ്പിക്കുന്നത്. ശേഷിക്കുന്ന വൈദ്യുതി പുറത്തുനിന്ന് വാങ്ങേണ്ടിവരുന്നത് സംസ്ഥാനത്തിന് വലിയ സാമ്പത്തിക ബാധ്യത സൃഷ്ടിക്കുന്നുണ്ടെന്നും അദ്ദേഹം പറഞ്ഞു.
നിലവിൽ ഏകദേശം 13,000 കോടി രൂപയായ വൈദ്യുതി വാങ്ങൽ ചെലവ് ഈ വർഷം 16,000 കോടി രൂപ കവിയാൻ സാധ്യതയുണ്ട്. ഉയർന്ന വിലയ്ക്ക് വൈദ്യുതി വാങ്ങേണ്ട സാഹചര്യം സൃഷ്ടിച്ച മുൻകാല വൈദ്യുതി വാങ്ങൽ കരാറുകളിലെയും നടപടിക്രമങ്ങളിലെയും വീഴ്ചകൾ ഇനി ആവർത്തിക്കില്ലെന്നും മുഖ്യമന്ത്രി വ്യക്തമാക്കി.
ജലവൈദ്യുതിയിൽ മാത്രം ആശ്രയം വേണ്ട
ജലവൈദ്യുത പദ്ധതികളെ മാത്രം ആശ്രയിച്ച് സംസ്ഥാനത്തിന്റെ ഭാവിയിലെ വൈദ്യുതി ആവശ്യകത നിറവേറ്റാൻ കഴിയില്ലെന്ന നിലപാടാണ് സർക്കാർ മുന്നോട്ടുവയ്ക്കുന്നത്. പരിസ്ഥിതി-പുനരധിവാസ ആശങ്കകൾ, സംസ്ഥാനത്തിന്റെ ഉയർന്ന ജനസാന്ദ്രത മൂലമുള്ള താപവൈദ്യുത പദ്ധതികളുടെ പരിമിതികൾ, വിവിധ ആണവോർജ പദ്ധതികൾക്കെതിരായ പ്രതിഷേധങ്ങൾ എന്നിവ കണക്കിലെടുത്ത് പുനരുപയോഗ ഊർജ സ്രോതസ്സുകളിലേക്ക് കൂടുതൽ ശക്തമായി മാറേണ്ടതുണ്ടെന്നും മുഖ്യമന്ത്രി പറഞ്ഞു.
പുതിയ നയത്തിൽ പുരപ്പുറ സൗരോർജ പദ്ധതികൾക്ക് പ്രധാന സ്ഥാനം നൽകും. സൗരോർജത്തെ കേവലം വൈദ്യുതി ഉൽപ്പാദനത്തിനുള്ള സേവനമേഖലയായി കാണാതെ വ്യവസായമായി വളർത്തിയെടുക്കാനാണ് സർക്കാർ ലക്ഷ്യമിടുന്നത്. ഈ മേഖലയിൽ നിക്ഷേപം നടത്താൻ താൽപര്യമുള്ളവർക്ക് നിലവിലുള്ള തടസ്സങ്ങൾ നീക്കി സർക്കാർ പിന്തുണ നൽകുമെന്നും മുഖ്യമന്ത്രി അറിയിച്ചു.
ബാറ്ററി സംഭരണവും പമ്പ്ഡ് സ്റ്റോറേജും
പകൽ സമയത്തെ വൈദ്യുതി ഉപഭോഗം പരമാവധി ക്രമീകരിക്കുക, കമ്മ്യൂണിറ്റി തലത്തിൽ ബാറ്ററി സംഭരണ സംവിധാനങ്ങൾ സ്ഥാപിക്കുക, വൈദ്യുത വാഹനങ്ങളുടെ ചാർജിങ് പകൽ സമയത്തേക്ക് മാറ്റുക, പമ്പ് സെറ്റുകളുടെ ഉപയോഗം ക്രമീകരിക്കുക, പമ്പ്ഡ്-സ്റ്റോറേജ് സംവിധാനങ്ങൾ നടപ്പാക്കുക തുടങ്ങിയ നിർദേശങ്ങളും പുതിയ ഊർജ മാനേജ്മെന്റ് സമീപനത്തിന്റെ ഭാഗമായി പരിഗണിക്കും.
പ്രസരണ നഷ്ടം എട്ട് ശതമാനത്തിൽ താഴെയാക്കാനും വൈദ്യുതി മോഷണം തടയാനും കഴിഞ്ഞത് നേട്ടമാണെന്നും മുഖ്യമന്ത്രി പറഞ്ഞു.
എസി ഉപയോഗവും പുതിയ വ്യവസായങ്ങളും പരിഗണനയിൽ
കാലാവസ്ഥാ വ്യതിയാനത്തിന്റെ പശ്ചാത്തലത്തിൽ വീടുകളിലും സ്ഥാപനങ്ങളിലും എയർ കണ്ടീഷണറുകളുടെ ഉപയോഗം വർധിക്കുന്നത് വൈദ്യുതി ആവശ്യകത ഉയർത്തുന്ന ഘടകമാണ്. സെമികണ്ടക്ടർ, കൃത്രിമ ബുദ്ധി തുടങ്ങിയ ഊർജ ഉപഭോഗം കൂടുതലുള്ള പുതിയ വ്യവസായങ്ങൾ കേരളത്തിൽ വളരുമ്പോൾ ഉണ്ടാകാനിടയുള്ള അധിക വൈദ്യുതി ആവശ്യകതയും പുതിയ വൈദ്യുതി നയത്തിൽ പരിഗണിക്കുമെന്ന് മുഖ്യമന്ത്രി വ്യക്തമാക്കി.
നിലവിലെ പ്രതിസന്ധിയിൽ നിന്ന് കേരളം പാഠം ഉൾക്കൊണ്ട്, വൈദ്യുതി ഉൽപ്പാദനം, സംഭരണം, പ്രസരണം, ഉപഭോഗം എന്നിവയെ കൂടുതൽ കാര്യക്ഷമമായി ഏകോപിപ്പിക്കുന്ന ദീർഘകാല ഊർജ സംവിധാനത്തിലേക്കാണ് നീങ്ങേണ്ടതെന്നതാണ് സർക്കാരിന്റെ സമീപനം.
ഒക്ടോബറിൽ പ്രഖ്യാപിക്കാനിരിക്കുന്ന പുതിയ വൈദ്യുതി നയം ഇതിന് നിർണായക ചുവടുവയ്പ്പാകുമെന്നാണ് സർക്കാരിന്റെ പ്രതീക്ഷ.