കണ്ണൂർ: കണ്ണൂർ സെൻട്രൽ ജയിലിൽ കാപ്പ നിയമപ്രകാരം തടവിൽ കഴിയുന്നവർ തമ്മിൽ സംഘർഷം. ഏറ്റുമുട്ടലിനിടെ ഒരു തടവുകാരന് കുത്തേറ്റു. കോട്ടയം സ്വദേശിയായ മനുവിനാണ് കുത്തേറ്റത്. സംഭവത്തിൽ എറണാകുളം സ്വദേശി അപ്പു എന്നയാൾക്ക് പങ്കുണ്ടെന്നാണ് പ്രാഥമിക വിവരം.
പരുക്കേറ്റ മനുവിനെ ഉടൻ തന്നെ പരിയാരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. പരുക്കിന്റെ ഗുരുതരാവസ്ഥ സംബന്ധിച്ച കൂടുതൽ വിവരങ്ങൾ പുറത്തുവന്നിട്ടില്ല. സംഭവത്തെ തുടർന്ന് ജയിൽ അധികൃതർ സ്ഥിതിഗതികൾ നിയന്ത്രണവിധേയമാക്കി.
അതേസമയം, കണ്ണൂർ സ്പെഷൽ സബ് ജയിലിലും തടവുകാരൻ ജയിൽ ഉദ്യോഗസ്ഥനെ ആക്രമിച്ച സംഭവം റിപ്പോർട്ട് ചെയ്തു. പീഡനക്കേസിൽ റിമാൻഡിൽ കഴിയുന്ന സുഹൈൽ എന്ന തടവുകാരനാണ് അസിസ്റ്റന്റ് പ്രിസൺ ഓഫിസറെ മർദിച്ചതെന്നാണ് വിവരം. സംഭവത്തിൽ പൊലീസ് കേസെടുത്തിട്ടുണ്ട്.
കണ്ണൂർ സെൻട്രൽ ജയിലിൽ കാപ്പ തടവുകാർ തമ്മിലുള്ള സംഘർഷം ആവർത്തിക്കുന്ന സാഹചര്യത്തിൽ ജയിൽ സുരക്ഷയും തടവുകാരുടെ നിയന്ത്രണ സംവിധാനങ്ങളും സംബന്ധിച്ചും ചോദ്യങ്ങൾ ഉയരുന്നുണ്ട്.