മലയാള സിനിമയുടെ ചരിത്രസാക്ഷി ജിയോ കുട്ടപ്പന് വിട

കൊച്ചി: മലയാള സിനിമയുടെ വിതരണ-നിർമാണ രംഗത്ത് ഏഴു പതിറ്റാണ്ടിലേറെക്കാലം സജീവമായിരുന്ന പ്രമുഖ നിർമ്മാതാവും വിതരണക്കാരനുമായ ജിയോ കുട്ടപ്പൻ എന്ന എൻ.ജി. ജോൺ (90) അന്തരിച്ചു. 90-ാം പിറന്നാളിന് ഒരു ദിവസം മുമ്പായിരുന്നു അന്ത്യം. പിറന്നാൾ ആഘോഷത്തിനായി കുടുംബം തയ്യാറെടുക്കുന്നതിനിടെയുണ്ടായ ഹൃദയാഘാതമാണ് മരണത്തിലേക്ക് നയിച്ചത്.

നിശ്ശബ്ദ സിനിമയുടെ കാലം മുതൽ മലയാള സിനിമയുടെ വളർച്ചയ്ക്കും പരിണാമത്തിനും സാക്ഷിയായ വ്യക്തിയായിരുന്നു എൻ.ജി. ജോൺ. ജിയോ പിക്ചേഴ്സിന്റെയും ജിയോ മൂവീസിന്റെയും സാരഥിയായി നിരവധി ശ്രദ്ധേയ സിനിമകളുടെ നിർമാണത്തിലും വിതരണത്തിലും അദ്ദേഹം പങ്കാളിയായി. സത്യന്റെ അവസാന ചിത്രമായ ‘ശരശയ്യ’, ‘മീൻ’, ‘തുഷാരം’, ‘ഈനാട്’, ‘ഇന്നല്ലെങ്കിൽ നാളെ’, ‘ഉണരൂ’ തുടങ്ങിയ ചിത്രങ്ങളുമായി അദ്ദേഹത്തിന്റെ പേര് മലയാള സിനിമാ ചരിത്രത്തിൽ രേഖപ്പെട്ടുകിടക്കുന്നു. ‘സിനിമയും ഞാനും – 70 വർഷങ്ങൾ’ എന്ന പുസ്തകത്തിലൂടെ ഏഴു പതിറ്റാണ്ടിന്റെ സിനിമാനുഭവങ്ങളും അദ്ദേഹം രേഖപ്പെടുത്തിയിട്ടുണ്ട്.

ചിത്രഭൂമിവാരികയുടെയും മാതൃഭൂമിയുടെ മുൻ പത്രാധിപസമിതി അംഗവുമായിരുന്നപ്രേംചന്ദ് അദ്ദേഹഞ്ഞെ അനുസ്മരിച്ച് തന്റെ 

ഫെയ്സ്ബുക്കിൽ പങ്കുവെച്ച അനുസ്മരണക്കുറിപ്പിൽ മലയാള സിനിമയുടെ ചരിത്രത്തോടൊപ്പം സഞ്ചരിച്ച എൻ.ജി. ജോണിന്റെ ജീവിതവും സിനിമാ യാത്രയും വിശദമായി ഓർത്തെടുക്കുന്നു.

“നടന്ന ഏത് സിനിമയുടെയും ചരിത്രം ചികഞ്ഞാൽ അതിന്റെ ഓരങ്ങളിൽ നടക്കാതെ പോയ എത്രയോ സിനിമകളുടെ അദൃശ്യചരിത്രം മറഞ്ഞുകിടപ്പുണ്ടാകും” എന്ന നിരീക്ഷണത്തോടെയാണ് പ്രേംചന്ദ് ജിയോ കുട്ടപ്പേട്ടന്റെ സിനിമാജീവിതത്തെ അടയാളപ്പെടുത്തുന്നത്. സിനിമ നടത്തിയെടുക്കലിലെ ഏഴ് പതിറ്റാണ്ടിന്റെ വിജയങ്ങളുടെയും പരാജയങ്ങളുടെയും അനുഭവമുള്ള ജിയോ കുട്ടപ്പന്റെ സിനിമാ ആത്മകഥപോലൊരു രേഖ മലയാളത്തിൽ അപൂർവമാണെന്നും അദ്ദേഹം പറയുന്നു.

എൻ.ജി. ജോണിന്റെ ‘സിനിമയും ഞാനും – 70 വർഷങ്ങൾ’ എന്ന പുസ്തകം മലയാള സിനിമയുടെ വിതരണ-നിർമാണ രംഗത്തെ ഏഴു പതിറ്റാണ്ടിന്റെ അനുഭവങ്ങൾ ക്രോഡീകരിച്ച കൃതിയാണെന്നും പ്രേംചന്ദ് ചൂണ്ടിക്കാട്ടുന്നു. നിശ്ശബ്ദ സിനിമയുടെ കാലത്തുനിന്ന് ശബ്ദസിനിമയിലേക്കും പിന്നീട് മദിരാശിയിൽ നിന്ന് കേരളത്തിലേക്കുമുള്ള സിനിമയുടെ ചുവടുമാറ്റത്തിന്റെയും നേർസാക്ഷ്യമാണ് ഈ പുസ്തകമെന്നും അദ്ദേഹം വിലയിരുത്തുന്നു.

‘ഈനാട്’ പിറന്ന കഥ

മലയാളത്തിലെ രാഷ്ട്രീയ സിനിമയുടെ ചരിത്രം മാറ്റിയെഴുതിയ ‘ഈനാട്’ (1982) ജിയോ മൂവീസിന്റെ ബാനറിൽ കുട്ടപ്പേട്ടൻ നിർമ്മിച്ച ചിത്രമായിരുന്നു. ഐ.വി. ശശി സംവിധാനം ചെയ്ത് ടി. ദാമോദരൻ തിരക്കഥയെഴുതിയ ചിത്രം 125 ദിവസം തുടർച്ചയായി പ്രദർശിപ്പിക്കുകയും 1982-ലെ മികച്ച ജനപ്രിയ സിനിമയ്ക്കുള്ള സംസ്ഥാന പുരസ്കാരം നേടുകയും ചെയ്തു.

എറണാകുളത്ത് നിന്ന് ആലപ്പുഴയിലേക്കുള്ള യാത്രയ്ക്കിടെ അരൂരിലെ ഒരു മതിലിൽ കണ്ട ‘ട്രേഡ് യൂണിയൻ മുതലാളിമാരെ ഒറ്റപ്പെടുത്തുക’ എന്ന ചുമരെഴുത്താണ് ‘ഈനാട്’ എന്ന സിനിമയുടെ ആശയത്തിലേക്ക് കുട്ടപ്പേട്ടനെ എത്തിച്ചതെന്ന് പ്രേംചന്ദ് കുറിപ്പിൽ പറയുന്നു. ചുമരെഴുത്തിന്റെ അർത്ഥത്തെക്കുറിച്ചുള്ള സംശയം ടി. ദാമോദരൻ മാസ്റ്ററുമായി പങ്കുവെച്ചതോടെയാണ് സിനിമയുടെ പ്രമേയം രൂപപ്പെട്ടത്.

‘ഈനാട്’ പിന്നീട് വിവിധ ഇന്ത്യൻ ഭാഷകളിലേക്കും എത്തി. തമിഴിൽ ‘ഇത് എങ്ക നാട്’, തെലുങ്കിൽ ‘ഈനാട്’, ഹിന്ദിയിൽ ‘യെ ദേശ്’ എന്നീ പേരുകളിൽ ചിത്രം പുനർനിർമിക്കപ്പെട്ടു. തമിഴ് പതിപ്പിന്റെ അവകാശത്തിനായി എം.ജി. രാമചന്ദ്രനും കരുണാനിധിയും രംഗത്തെത്തിയ സംഭവവും പ്രേംചന്ദ് വിശദമായി ഓർമിക്കുന്നു.

സത്യന്റെ അവസാന ചിത്രമായ ‘ശരശയ്യ’

നടൻ സത്യന്റെ അവസാന സിനിമയായ **‘ശരശയ്യ’**യുടെ നിർമാണത്തിലും ജിയോ മൂവീസ് നിർണായക പങ്കുവഹിച്ചു. സംവിധായകനാകാനുള്ള തോപ്പിൽ ഭാസിയുടെ ആഗ്രഹം സാക്ഷാത്കരിക്കുന്നതിനാണ് കുട്ടപ്പേട്ടൻ ‘ശരശയ്യ’ ഏറ്റെടുത്തതെന്നും പ്രേംചന്ദിന്റെ കുറിപ്പിലുണ്ട്.

മിനിമം ഗാരന്റി അടിസ്ഥാനത്തിൽ നിർമ്മിച്ച ചിത്രത്തിന് പിന്നീട് മികച്ച സാമ്പത്തിക വിജയം ലഭിച്ചതായും അദ്ദേഹം ഓർക്കുന്നു.

ദാമോദരൻ മാസ്റ്ററുടെ പ്രിയപ്പെട്ട നിർമ്മാതാവ്

ടി. ദാമോദരൻ മാസ്റ്ററുമായി അടുത്ത ബന്ധം പുലർത്തിയ നിർമ്മാതാവായിരുന്നു ജിയോ കുട്ടപ്പേട്ടൻ. ജിയോ നിർമ്മിച്ച നിരവധി സിനിമകൾക്ക് ദാമോദരൻ മാസ്റ്ററായിരുന്നു രചയിതാവ്.

‘മീൻ’ (1980), ‘തുഷാരം’ (1981), ‘ഈനാട്’ (1982), ‘ഇന്നല്ലെങ്കിൽ നാളെ’ (1982), ‘ഇനിയെങ്കിലും’ (1983), ‘ഉണരൂ’ (1984), ‘ഇത്രയും കാലം’ (1987) എന്നിവയാണ് ഈ കൂട്ടുകെട്ടിൽ പിറന്ന പ്രധാന ചിത്രങ്ങൾ.

മണിരത്നത്തിന് അവസരം നൽകിയ നിർമ്മാതാവ്

മണിരത്നം സംവിധാനം ചെയ്ത ഏക മലയാള ചിത്രമായ ‘ഉണരൂ’ (1984) നിർമ്മിച്ചതും ജിയോ കുട്ടപ്പേട്ടനായിരുന്നു. ട്രേഡ് യൂണിയൻ മുതലാളിത്തത്തെ പ്രമേയമാക്കിയ സങ്കീർണമായ വിഷയമാണ് ചിത്രത്തിലൂടെ അവതരിപ്പിച്ചത്.

അന്ന് ഒരു കന്നഡ ചിത്രം മാത്രം സംവിധാനം ചെയ്തിരുന്ന മണിരത്നത്തിന് ഇത്രയും ഭാരിച്ചൊരു പ്രമേയം ഏൽപ്പിക്കാൻ കുട്ടപ്പേട്ടൻ തയ്യാറായതും പ്രേംചന്ദ് അനുസ്മരണക്കുറിപ്പിൽ എടുത്തുപറയുന്നു.

സിനിമയിലേക്ക് എത്തിയ കുടുംബം

1939-ൽ കായംകുളത്തെ ടൂറിങ് ടാക്കീസിൽ ‘ശൈശവ വിവാഹം’ എന്ന നിശ്ശബ്ദ സിനിമ കണ്ട അനുഭവത്തിൽ നിന്നാണ് എൻ.ജി. ജോണിന്റെ സിനിമാ ഓർമകൾ ആരംഭിക്കുന്നത്. അദ്ദേഹത്തിന്റെ പിതാവ് എൻ.എക്സ്. ജോർജ് സിനിമാ വിതരണത്തിലേക്ക് കടന്നതോടെയാണ് കുടുംബത്തിന്റെ സിനിമാബന്ധം ശക്തമായത്.

‘ദയാളൻ’ എന്ന സിനിമയുടെ വിതരണത്തിലൂടെ സിനിമാ ബിസിനസിന്റെ സാധ്യത തിരിച്ചറിഞ്ഞ എൻ.എക്സ്. ജോർജ് പിന്നീട് റബർ വ്യാപാരം അവസാനിപ്പിച്ച് ജിയോ പിക്ചേഴ്സ് ആരംഭിച്ചു. എ.വി. മെയ്യപ്പൻ ഉൾപ്പെടെയുള്ള പ്രമുഖ നിർമ്മാതാക്കളുടെ ചിത്രങ്ങൾ കേരളത്തിൽ വിതരണം ചെയ്തുകൊണ്ട് സ്ഥാപനം വളർന്നു.

മദിരാശിയിലെ ലയോള കോളേജിൽ പഠിച്ച എൻ.ജി. ജോൺ 1954-ൽ ബി.എസ്.സി. പൂർത്തിയാക്കിയ ശേഷം കുടുംബത്തിന്റെ സിനിമാ ബിസിനസിൽ സജീവമായി. അമേരിക്കയിൽ മെഡിസിൻ പഠിക്കാനുള്ള അവസരം ലഭിച്ചിരുന്നെങ്കിലും അത് ഉപേക്ഷിച്ചാണ് അദ്ദേഹം സിനിമയെ ജീവിതമാർഗമായി തിരഞ്ഞെടുത്തത്.

ജിയോ മൂവീസിന്റെ സുവർണകാലം

1954-ൽ ജിയോ മൂവീസിന്റെ ചുമതല ഏറ്റെടുത്ത ശേഷം 1984 വരെയുള്ള മൂന്ന് പതിറ്റാണ്ടിനിടെ ഏകദേശം 90 മലയാള സിനിമകൾ കേരളത്തിൽ വിതരണം ചെയ്തതായി പ്രേംചന്ദ് രേഖപ്പെടുത്തുന്നു. വിജയങ്ങൾക്കൊപ്പം പരാജയങ്ങളും ഏറ്റുവാങ്ങിയെങ്കിലും സിനിമയിൽ നിന്ന് പിന്മാറാൻ കുട്ടപ്പേട്ടന്റെ മനസ്സ് തയ്യാറായിരുന്നില്ല.

1977-ൽ ശശികുമാർ സംവിധാനം ചെയ്ത് പ്രേംനസീർ നായകനായ ‘മിനിമോൾ’ ആയിരുന്നു ജിയോ മൂവി പ്രൊഡക്ഷൻസിന്റെ ആദ്യ മലയാള സിനിമ.

പിന്നീട് സിനിമാ നിർമ്മാണത്തിൽ നിന്ന് മാറിനിന്നെങ്കിലും ഉപദേശകനായും വഴികാട്ടിയായും നിരവധി സിനിമാ പദ്ധതികളുമായി അദ്ദേഹം ബന്ധം തുടർന്നു.

നടക്കാതെ പോയ സിനിമയുടെയും ചരിത്രം

മലയാള സിനിമയുടെ മാറിയ കാലത്തിനൊപ്പം ജിയോ കുട്ടപ്പേട്ടനും പതിയെ നിശബ്ദനായി. വർഷങ്ങൾക്കുശേഷം ടി. ദാമോദരൻ മാസ്റ്ററെ വീണ്ടും തേടിയെത്തി ‘ഈനാട് 2’ എന്ന സിനിമയ്ക്കുള്ള ശ്രമം നടത്തിയെങ്കിലും പദ്ധതി യാഥാർഥ്യമായില്ല.

“സിനിമ അങ്ങിനെയാണ്; നടന്നതിന്റെ മാത്രം ചരിത്രമല്ല, നടക്കാതെ പോയതിന്റെയും അദൃശ്യചരിത്രമാണ്” എന്ന നിരീക്ഷണത്തിലാണ് പ്രേംചന്ദ് തന്റെ അനുസ്മരണം അവസാനിപ്പിക്കുന്നത്.

മലയാള സിനിമയുടെ ഒരു വലിയ കാലഘട്ടത്തിന്റെ ജീവിച്ചിരുന്ന ചരിത്രസാക്ഷിയായിരുന്നു എൻ.ജി. ജോൺ. അദ്ദേഹത്തിന്റെ വിയോഗത്തോടെ മലയാള സിനിമയുടെ ആദ്യകാല വിതരണ-നിർമാണ ചരിത്രത്തിലെ ഒരു പ്രധാന കണ്ണിയാണ് നഷ്ടമായത്.