തിരുവനന്തപുരം: ഇന്ന്, സെപ്റ്റംബർ 4ന് വൈകിട്ട് കേരളത്തിന്റെ ആകാശത്ത് അന്താരാഷ്ട്ര ബഹിരാകാശ നിലയം (ISS) ദൃശ്യമാകും. വൈകിട്ട് 7.45ഓടെയാണ് കേരളത്തിൽനിന്ന് ISS കാണാനുള്ള മികച്ച അവസരം. തിരുവനന്തപുരം കേന്ദ്രീകരിച്ചുള്ള ട്രാക്കിങ് വിവരങ്ങൾ പ്രകാരം 7.44ന് തെക്കുപടിഞ്ഞാറൻ ആകാശത്ത് പ്രത്യക്ഷപ്പെടുന്ന ISS വടക്കുകിഴക്ക് ദിശയിലേക്ക് നീങ്ങും. ഏകദേശം ആറു മിനിറ്റോളം ദൃശ്യമായിരിക്കുമെന്നാണ് കണക്കാക്കുന്നത്.
നഗ്നനേത്രങ്ങൾകൊണ്ട് തന്നെ ISS-നെ തിരിച്ചറിയാനാകും. മിന്നിമറയാത്ത, തെളിഞ്ഞ നക്ഷത്രം അതിവേഗം ആകാശത്തിലൂടെ സഞ്ചരിക്കുന്നതുപോലെയായിരിക്കും കാഴ്ച. വിമാനം പോലെ ലൈറ്റുകൾ മിന്നിക്കുകയോ ദിശ പെട്ടെന്ന് മാറ്റുകയോ ചെയ്യില്ല.
ISS-ന് ഭൂമിയിൽനിന്ന് ഏകദേശം 400 കിലോമീറ്റർ ഉയരത്തിലാണ് ഭ്രമണം. മണിക്കൂറിൽ ഏകദേശം 28,000 കിലോമീറ്റർ വേഗതയിൽ സഞ്ചരിക്കുന്നതിനാൽ ഏതാനും മിനിറ്റുകൾക്കുള്ളിൽ തന്നെ ആകാശത്തിന്റെ ഒരു ഭാഗത്തുനിന്ന് മറ്റൊരുഭാഗത്തേക്ക് കടന്നുപോകും. സൂര്യപ്രകാശം ISS-ൽ പ്രതിഫലിക്കുന്നതിനാലാണ് സന്ധ്യാസമയത്ത് ഭൂമിയിൽനിന്ന് ഇത് വ്യക്തമായി കാണാൻ കഴിയുന്നത്.
ഇന്ന് വൈകിട്ട് 7.40ന് ശേഷം ആകാശനിരീക്ഷണം തുടങ്ങുന്നതാണ് ഉചിതം. മേഘാവൃതമല്ലാത്ത തുറന്ന ആകാശമാണ് മികച്ച കാഴ്ചയ്ക്ക് വേണ്ടത്. കൃത്യമായ സമയം സ്ഥലത്തിനനുസരിച്ച് ചെറിയ വ്യത്യാസം വരാം. NASAയുടെ Spot the Station സംവിധാനത്തിലൂടെയും ഓരോ പ്രദേശത്തെയും കൃത്യമായ ദൃശ്യതാ സമയം പരിശോധിക്കാം.