ഇൻസ്റ്റഗ്രാം അല്ല, ‘ഇൻസ്റ്റഗ്സാം’ എന്നോ? 10 വർഷത്തിന് ശേഷം വേഡ്‌മാർക്ക് മാറ്റി ഇൻസ്റ്റഗ്രാം

പത്ത് വർഷത്തിന് ശേഷം ‘ഇൻസ്റ്റഗ്രാം’ എന്ന പേരിന്റെ രൂപകൽപ്പനയിൽ മാറ്റം വരുത്തി ഇൻസ്റ്റഗ്രാം. പ്ലാറ്റ്‌ഫോമിന്റെ പരിചിതമായ ക്യാമറ ഐക്കൺ അതേപടി നിലനിർത്തിക്കൊണ്ടാണ് ഇത്തവണ ‘Instagram’ എന്ന വേഡ്‌മാർക്ക് പുതുക്കിയത്. പുതിയ അക്ഷരരൂപം കൂടുതൽ വൃത്തിയുള്ളതും ആധുനികവുമായ രൂപം നൽകുക എന്ന ലക്ഷ്യത്തോടെയാണ് അവതരിപ്പിച്ചതെന്ന് ഇൻസ്റ്റഗ്രാം മേധാവി ആദം മൊസേരി വ്യക്തമാക്കി. പുതിയ വേഡ്‌മാർക്കിൽ പഴയ കൈയെഴുത്ത് ശൈലിയുടെ സ്വഭാവം നിലനിർത്തുന്നതിനൊപ്പം കൂടുതൽ ആധുനികമായ അക്ഷരരൂപമാണ് ഉപയോഗിച്ചിരിക്കുന്നത്. എന്നാൽ പുതിയ രൂപം പുറത്തുവന്നതോടെ സമൂഹമാധ്യമങ്ങളിൽ വലിയ ചർച്ചയ്ക്കും പരിഹാസത്തിനും ഇടയാക്കി. പ്രത്യേകിച്ച് ‘r’ എന്ന അക്ഷരം ചിലർക്ക് ‘z’ പോലെ തോന്നുന്നതാണ് പ്രധാന വിമർശനം. ഇതോടെ ‘Instagram’ എന്ന പേര് ‘Instagzam’ ആയി വായിക്കപ്പെടുന്നുവെന്ന തരത്തിലുള്ള പ്രതികരണങ്ങളും സമൂഹമാധ്യമങ്ങളിൽ വ്യാപകമായി. ഇൻസ്റ്റഗ്രാമിന്റെ ഡിസൈൻ ചരിത്രത്തിൽ 2016 മേയ് 11-നായിരുന്നു ഏറ്റവും ശ്രദ്ധേയമായ മുൻകാല മാറ്റം. അന്ന് പഴയ ബ്രൗൺ നിറത്തിലുള്ള റെട്രോ ക്യാമറ ഐക്കണിന് പകരം പർപ്പിൾ, പിങ്ക്, ഓറഞ്ച് നിറങ്ങളുള്ള ഗ്രേഡിയന്റ് പശ്ചാത്തലത്തിലുള്ള ലളിതമായ ക്യാമറ ചിഹ്നം അവതരിപ്പിച്ചു. ആ സമയത്ത് ആപ്പിന്റെ ഇന്റർഫേസിലും വലിയ മാറ്റം വരുത്തിയിരുന്നു. 2022-ൽ ഐക്കണിലെ ഗ്രേഡിയന്റ് നിറങ്ങൾ കൂടുതൽ തിളക്കമുള്ളതാക്കി പരിഷ്കരിച്ചിരുന്നെങ്കിലും, 2016-ൽ അവതരിപ്പിച്ച അടിസ്ഥാന ക്യാമറ രൂപകൽപ്പന നിലനിർത്തുകയായിരുന്നു. അതുകൊണ്ടുതന്നെയാണ് 2026-ലെ വേഡ്‌മാർക്ക് മാറ്റം പത്ത് വർഷത്തിന് ശേഷമുള്ള പ്രധാന ടൈപ്പോഗ്രാഫിക് പുതുക്കലായി കണക്കാക്കപ്പെടുന്നത്. പുതിയ ഡിസൈൻ കൂടുതൽ ആധുനികവും വൃത്തിയുള്ളതുമാക്കാനാണ് ശ്രമമെന്ന് ഇൻസ്റ്റഗ്രാം പറയുമ്പോഴും, ഉപയോക്താക്കൾക്കിടയിലെ പ്രതികരണം സമ്മിശ്രമാണ്. ഏറെ പരിചിതമായിരുന്ന പഴയ എഴുത്തുരൂപത്തിൽ നിന്ന് വ്യത്യസ്തമായ പുതിയ ശൈലി വായിക്കാൻ ബുദ്ധിമുട്ടാണെന്ന വിമർശനവും ഉയർന്നിട്ടുണ്ട്. പുതിയ വേഡ്‌മാർക്കിനൊപ്പം ഇൻസ്റ്റഗ്രാം അതിന്റെ ടൈപ്പോഗ്രാഫിക് സംവിധാനത്തിലും ശ്രദ്ധ ചെലുത്തുന്നുണ്ട്. ഇൻസ്റ്റഗ്രാം സാൻസ് എന്ന ഫോണ്ടിനൊപ്പം കൈയെഴുത്ത് സ്വഭാവമുള്ള ‘Instagram Pen’, മോണോസ്പേസ് ശൈലിയിലുള്ള ‘Instagram Mono’ എന്നീ അക്ഷരരൂപങ്ങളും അവതരിപ്പിക്കുന്ന ഡിസൈൻ മാറ്റത്തിന്റെ ഭാഗമാണിത്. പുതിയ മാറ്റം ഇൻസ്റ്റഗ്രാമിന്റെ മുഖമുദ്രയായ ക്യാമറ ഐക്കണിനെ മാറ്റുന്നില്ല. പകരം, വർഷങ്ങളായി പ്ലാറ്റ്‌ഫോമിനൊപ്പം വളർന്ന വേഡ്‌മാർക്കിന് പുതിയ കാലത്തിനൊത്ത രൂപം നൽകുകയാണ് ലക്ഷ്യം. എന്നാൽ പുതിയ ‘r’ കണ്ടിട്ട് അത് ‘z’ ആണെന്ന് തോന്നുന്നുവെന്ന ഉപയോക്താക്കളുടെ പ്രതികരണങ്ങൾ ഡിസൈൻ മാറ്റത്തെ ഇൻസ്റ്റഗ്രാമിന്റെ പ്രതീക്ഷിച്ചതിലും വലിയ ചർച്ചയാക്കി മാറ്റിയിരിക്കുകയാണ്.