റിയാദ്: ഗള്‍ഫ് രാജ്യങ്ങളിലേക്ക് യാത്ര ചെയ്യാന്‍ ഇനി ഓരോ രാജ്യത്തിനും പ്രത്യേകം ടൂറിസ്റ്റ് വിസ എടുക്കേണ്ടിവരാത്ത സംവിധാനം ഉടന്‍ യാഥാര്‍ഥ്യമാകുമെന്ന് ഗള്‍ഫ് സഹകരണ കൗണ്‍സില്‍ (ജിസിസി). ജിസിസി ഗ്രാന്‍ഡ് ടൂറിസ്റ്റ് വിസ ഉടന്‍ പുറത്തിറക്കുമെന്ന് ജിസിസി സെക്രട്ടറി ജനറല്‍ ജാസിം മുഹമ്മദ് അല്‍ ബുദൈവി അറിയിച്ചു.
സെപ്റ്റംബര്‍ ആറിന് റിയാദില്‍ നടന്ന സെക്യൂരിറ്റി ആന്‍ഡ് ഹിസ്റ്ററി ഡയലോഗ് 2026ന്റെ പ്രത്യേക സെഷനിലാണ് ജിസിസി സെക്രട്ടറി ജനറല്‍ ഇക്കാര്യം വ്യക്തമാക്കിയത്.
പദ്ധതി നിലവില്‍ വരുന്നതോടെ ഒരു ടൂറിസ്റ്റ് വിസ ഉപയോഗിച്ച് ജിസിസിയിലെ ആറ് രാജ്യങ്ങളും സന്ദര്‍ശിക്കാന്‍ സാധിക്കും. യുഎഇ, സൗദി അറേബ്യ, ബഹ്‌റൈന്‍, ഖത്തര്‍, ഒമാന്‍, കുവൈത്ത് എന്നിവയാണ് പദ്ധതിയില്‍ ഉള്‍പ്പെടുന്നത്.
യൂറോപ്പിലെ ഷെങ്കന്‍ വിസ സംവിധാനത്തിന് സമാനമായ രീതിയിലാണ് ജിസിസി ഏകീകൃത ടൂറിസ്റ്റ് വിസ വിഭാവനം ചെയ്തിരിക്കുന്നത്. അതായത്, വിനോദസഞ്ചാരികള്‍ക്ക് ഗള്‍ഫ് മേഖലയെ ഒരു ഏകീകൃത ടൂറിസം കേന്ദ്രമായി പരിഗണിച്ച് വിവിധ രാജ്യങ്ങള്‍ ഒരേ യാത്രയില്‍ സന്ദര്‍ശിക്കാന്‍ കൂടുതല്‍ സൗകര്യമൊരുങ്ങും.
2023ല്‍ അംഗീകാരം
ജിസിസി ഏകീകൃത ടൂറിസ്റ്റ് വിസ പദ്ധതിക്ക് 2023 ഒക്ടോബറില്‍ ജിസിസി ടൂറിസം മന്ത്രിമാര്‍ അംഗീകാരം നല്‍കിയിരുന്നു. തുടര്‍ന്ന് ആഭ്യന്തര മന്ത്രിമാരുടെ തലത്തിലും പദ്ധതിക്ക് അംഗീകാരം ലഭിച്ചു. ഇതിന് പിന്നാലെ ഏകീകൃത വിസ നടപ്പാക്കുന്നതിനുള്ള നടപടികള്‍ പുരോഗമിച്ചുവരികയാണ്.
പുതിയ വിസയിലൂടെ ഗള്‍ഫ് രാജ്യങ്ങള്‍ക്കിടയിലെ യാത്ര കൂടുതല്‍ ലളിതമാക്കുന്നതിനൊപ്പം അന്താരാഷ്ട്ര വിനോദസഞ്ചാരികളെ കൂടുതല്‍ ആകര്‍ഷിക്കുകയാണ് ജിസിസിയുടെ പ്രധാന ലക്ഷ്യം. ആറ് രാജ്യങ്ങളെയും ചേര്‍ത്ത് ഒരു വലിയ ടൂറിസം വിപണി സൃഷ്ടിക്കാനും ഇതിലൂടെ ലക്ഷ്യമിടുന്നു.
കൂടുതല്‍ വിവരങ്ങള്‍ പുറത്തുവിടാനുണ്ട്
അതേസമയം, ഗ്രാന്‍ഡ് ടൂറിസ്റ്റ് വിസയുടെ കൃത്യമായ ആരംഭ തീയതി, അപേക്ഷാ നടപടിക്രമം, വിസാ നിരക്ക്, സാധുതാ കാലാവധി, ഒരു യാത്രികന്‍ ഓരോ രാജ്യത്തും എത്ര ദിവസം തങ്ങാനാകും തുടങ്ങിയ വിശദാംശങ്ങള്‍ ഇതുവരെ ഔദ്യോഗികമായി പ്രഖ്യാപിച്ചിട്ടില്ല.
അതിനാല്‍ ഇപ്പോള്‍ ലഭിച്ചിരിക്കുന്ന പ്രഖ്യാപനം പദ്ധതിയുടെ അടുത്ത ഘട്ടത്തിലേക്കുള്ള സൂചന മാത്രമാണ്. ഔദ്യോഗിക അപേക്ഷാ പോര്‍ട്ടലും നിബന്ധനകളും പ്രഖ്യാപിച്ച ശേഷമായിരിക്കും വിനോദസഞ്ചാരികള്‍ക്ക് അപേക്ഷിക്കാന്‍ സാധിക്കുക.
ഗള്‍ഫ് രാജ്യങ്ങള്‍ സന്ദര്‍ശിക്കാന്‍ ആഗ്രഹിക്കുന്ന വിദേശ വിനോദസഞ്ചാരികള്‍ക്ക്, പ്രത്യേകിച്ച് ഒന്നിലധികം ജിസിസി രാജ്യങ്ങള്‍ ഒരേ യാത്രയില്‍ ഉള്‍പ്പെടുത്തുന്നവര്‍ക്ക്, പുതിയ വിസാ സംവിധാനം വലിയ മാറ്റമാകുമെന്നാണ് വിലയിരുത്തല്‍.