കണ്ണൂർ: ഉത്തര മലബാറിന്റെ വ്യോമയാത്രാ രംഗത്ത് പുതിയ പ്രതീക്ഷയായി മലയാളി ഉടമസ്ഥതയിലുള്ള പ്രാദേശിക വിമാനക്കമ്പനി FLY91. രാജ്യത്തെ ചെറു നഗരങ്ങളിലേക്കുള്ള സർവീസ് ശൃംഖല വിപുലീകരിക്കുന്നതിന്റെ ഭാഗമായി കണ്ണൂരിനെയും പരിഗണിക്കുന്നതായി കമ്പനി അറിയിച്ചു.
തൃശൂർ കുന്നംകുളം സ്വദേശിയായ മനോജ് ചാക്കോയുടെ നേതൃത്വത്തിലുള്ള FLY91 40 പുതിയ ATR 72-600 ടർബോപ്രോപ് വിമാനങ്ങൾക്ക് ഓർഡർ നൽകിയതാണ് വിപുലീകരണത്തിന്റെ പ്രധാന ചുവടുവയ്പ്. ഏകദേശം 100 കോടി ഡോളർ മൂല്യമുള്ളതാണ് കരാർ. ഒരു പ്രാദേശിക എയർലൈൻ ഒരുമിച്ച് ഇത്രയധികം ATR വിമാനങ്ങൾക്ക് ഓർഡർ നൽകുന്നത് ലോകത്ത് തന്നെ അപൂർവമായ നേട്ടമാണ്.
നിലവിൽ ആറ് വിമാനങ്ങളുമായി 12 നഗരങ്ങളിലേക്കായി പ്രതിവാരം ഏകദേശം 280 സർവീസുകളാണ് FLY91 നടത്തുന്നത്. പുതിയ വിമാനങ്ങൾ എത്തുന്നതോടെ ഏതാനും വർഷങ്ങൾക്കുള്ളിൽ കമ്പനിയുടെ വിമാനങ്ങളുടെ എണ്ണം 60 ആയി ഉയർത്താനാണ് ലക്ഷ്യം. അടുത്ത വർഷം അവസാനത്തോടെ പുതിയ വിമാനങ്ങൾ എത്തിത്തുടങ്ങുമെന്നാണ് കമ്പനി വ്യക്തമാക്കുന്നത്. അതുവരെ 6 മുതൽ 8 വരെ വിമാനങ്ങൾ കൂടി ലീസിനെടുക്കാനും പദ്ധതിയുണ്ട്.
കേരളത്തിൽ നിലവിൽ കൊച്ചിയിലേക്കുള്ള സർവീസിന് പുറമേ കണ്ണൂരിനെയും പുതിയ ശൃംഖലയിൽ ഉൾപ്പെടുത്തുന്നത് പരിഗണനയിലുണ്ട്. ടിയർ-2, ടിയർ-3 നഗരങ്ങളിലേക്കുള്ള കണക്ടിവിറ്റി വർധിപ്പിക്കുകയാണ് FLY91ന്റെ പ്രധാന ലക്ഷ്യം. അതിനാൽ കണ്ണൂർ വിമാനത്താവളത്തിലേക്കുള്ള സർവീസ് യാഥാർഥ്യമായാൽ ഉത്തര മലബാറിൽ നിന്നുള്ള ആഭ്യന്തര യാത്രക്കാർക്ക് കൂടുതൽ വിമാന ഓപ്ഷനുകൾ ലഭിക്കും.
72 യാത്രക്കാരെ വരെ വഹിക്കാൻ കഴിയുന്ന ATR 72-600 വിമാനങ്ങളാണ് FLY91 ഉപയോഗിക്കുന്നത്. കുറഞ്ഞ ദൂരത്തിലുള്ള റൂട്ടുകൾക്കും ചെറിയ വിമാനത്താവളങ്ങളിലേക്കുള്ള സർവീസുകൾക്കും അനുയോജ്യമായ വിമാനങ്ങളാണിവ. 2024ൽ ഗോവ കേന്ദ്രീകരിച്ച് പ്രവർത്തനം ആരംഭിച്ച കമ്പനിയാണ് FLY91.
കണ്ണൂരിനെ കൂടി ലക്ഷ്യമിട്ട് മലയാളിയുടെ വിമാനക്കമ്പനി വളർച്ചയുടെ പാതയിൽ മുന്നേറുമ്പോൾ, ഉത്തര മലബാറിന്റെ ആകാശയാത്രാ സാധ്യതകൾക്കും ഇത് പുതിയ വാതിൽ തുറക്കുമെന്നാണ് പ്രതീക്ഷ.