കൊച്ചി: രോഗകാലത്തെക്കുറിച്ചും തന്നെ പരിചരിച്ച ഡോക്ടർമാരുടെ കരുതലിനെക്കുറിച്ചും തുറന്നുപറഞ്ഞ് മലയാളത്തിന്റെ പ്രിയതാരം മമ്മൂട്ടി. കൈരളിയുടെ ഡോക്ടേഴ്സ് പുരസ്കാര വേദിയിൽ സംസാരിക്കവെയാണ് താൻ കടന്നുപോയ മാനസിക-ശാരീരിക ബുദ്ധിമുട്ടുകളെക്കുറിച്ച് താരം ഓർത്തെടുത്തത്. ആരോഗ്യപ്രശ്നങ്ങളെ തുടർന്ന് കഴിഞ്ഞ വർഷമാണ് മമ്മൂട്ടി അഭിനയത്തിൽ നിന്ന് ചെറിയൊരു ഇടവേള എടുത്തത്. മമ്മൂട്ടിയുടെ വാക്കുകളിലൂടെ:
ആശ്വാസമായ കരുതൽ
"ഞാൻ കുറേക്കാലത്തേക്ക് ഒരു രോഗിയായിരുന്നു. ഇപ്പോൾ രോഗമുക്തനാണെന്നാണ് എന്റെ വിശ്വാസം. ആ സമയത്ത് ഡോക്ടർമാരും നഴ്സുമാരുമൊക്കെ നൽകിയ ശുശ്രൂഷ നന്ദിയോടെ ഓർക്കുന്നു. ഞാൻ ഒരു പ്രമുഖനായതുകൊണ്ട് മാത്രമല്ല അവർ എന്നെ നന്നായി നോക്കിയത്. രോഗത്തിന്റെ വ്യാപ്തിയെക്കുറിച്ച് പറഞ്ഞ് അവർ എന്നെ ഒട്ടും ഭയപ്പെടുത്തിയിരുന്നില്ല." മാനസിക സംഘർഷങ്ങൾ മറികടന്നത്:
"ശരീരത്തെ ബാധിക്കുന്ന രോഗങ്ങൾ വലിയ മാനസിക സംഘർഷം ഉണ്ടാക്കാറുണ്ട്. ആദ്യമൊക്കെ ആ പേടിയുണ്ടാകുമെങ്കിലും പിന്നീട് നമ്മൾ അത് ഉൾക്കൊള്ളും. എന്നോട് ഒരു ഡോക്ടറും നെഗറ്റീവായി സംസാരിച്ചിട്ടില്ല. കേൾക്കുമ്പോൾ ഭയം തോന്നുന്ന രോഗമായിരുന്നിട്ടുപോലും പേടിപ്പിക്കാതെ ധൈര്യം നൽകാനാണ് അവർ ശ്രമിച്ചത്."
ദൈവത്തിന് തുല്യരായ ഡോക്ടർമാർ
"ഡോക്ടർമാർ ദൈവത്തിന് ഏറ്റവും അടുത്ത് നിൽക്കുന്നവരാണെന്ന് നമ്മൾ വിശ്വസിക്കുന്നു. രോഗത്തിന്റെ അവസാന ഘട്ടങ്ങളിൽ ഡോക്ടർമാർ പോലും പ്രാർത്ഥിക്കാൻ പറയുമ്പോഴാണ്, ഡോക്ടർക്ക് ശേഷമാണ് നമ്മൾ ദൈവത്തെ പ്രതീക്ഷിക്കുന്നത് എന്ന തിരിച്ചറിവുണ്ടാകുന്നത്. അതുകൊണ്ടുതന്നെ ഡോക്ടർമാർക്ക് നൽകുന്ന ഈ പുരസ്കാരം വെറുമൊരു അവാർഡല്ല; കാണപ്പെടുന്ന ദൈവങ്ങൾക്കുള്ള സമർപ്പണമാണ്." ഡോക്ടർമാർ നൽകിയ പിന്തുണയും പോസിറ്റീവ് സമീപനവുമാണ് തനിക്ക് വേഗത്തിൽ തിരികെയെത്താൻ കരുത്തായതെന്ന സന്ദേശത്തോടെയാണ് താരം വാക്കുകൾ അവസാനിപ്പിച്ചത്.