നിഷിൻ: ഏഷ്യൻ ഗെയിംസ് വനിതാ ക്രിക്കറ്റിൽ ചൈനയുടെ പോരാട്ടം ഒരു പന്തുപോലും നേരിടാതെ അവസാനിച്ചു. ക്വാർട്ടർ ഫൈനലിൽ ബംഗ്ലാദേശിനെ നേരിടേണ്ടിയിരുന്ന മത്സരം കനത്ത മഴയെ തുടർന്ന് ഉപേക്ഷിച്ചതോടെയാണ് ചൈന ടൂർണമെന്റിൽ നിന്ന് പുറത്തായത്.
ജപ്പാനിലെ ഐച്ചി പ്രവിശ്യയിലെ നിഷിൻ നഗരത്തിലുള്ള കരോജി സ്പോർട്സ് പാർക്കിലായിരുന്നു മത്സരം നിശ്ചയിച്ചിരുന്നത്. തുടർച്ചയായ മഴയെ തുടർന്ന് ഔട്ട്ഫീൽഡിൽ വെള്ളക്കെട്ട് രൂപപ്പെട്ടതോടെ കളി നടത്താനാകാത്ത സാഹചര്യമുണ്ടായി. ടോസ് പോലും നടത്താതെയാണ് മത്സരം ഉപേക്ഷിച്ചത്.
മത്സരത്തിന് ഫലം ലഭിക്കാതിരുന്ന സാഹചര്യത്തിൽ ഏഷ്യൻ ഗെയിംസ് ക്രിക്കറ്റ് ചട്ടപ്രകാരം ഉയർന്ന അന്താരാഷ്ട്ര റാങ്കുള്ള ടീമിന് സെമിഫൈനലിലേക്ക് നേരിട്ട് പ്രവേശനം ലഭിച്ചു. നിലവിലെ റാങ്കിങ്ങിൽ ബംഗ്ലാദേശ് 10-ാം സ്ഥാനത്തും ചൈന 36-ാം സ്ഥാനത്തുമാണ്. ഇതോടെ ബംഗ്ലാദേശ് സെമിഫൈനലിലേക്ക് മുന്നേറിയപ്പോൾ ചൈനയുടെ ഏഷ്യൻ ഗെയിംസ് ക്രിക്കറ്റ് യാത്ര അവസാനിച്ചു.
2010ന് ശേഷം ചൈനയുടെ മൂന്നാമത്തെ ഏഷ്യൻ ഗെയിംസ് ക്രിക്കറ്റ് സാന്നിധ്യമായിരുന്നു ഇത്. എന്നാൽ ഇത്തവണ ക്വാർട്ടർ ഫൈനലിൽ കളത്തിലിറങ്ങാൻ പോലും കഴിയാതെയാണ് ടീമിന് മടങ്ങേണ്ടിവന്നത്.
ബംഗ്ലാദേശ് ഇനി സെമിഫൈനലിൽ ഇന്ത്യ–ജപ്പാൻ ക്വാർട്ടർ ഫൈനലിലെ വിജയിയെ നേരിടും. ഇന്ത്യയുടെ ക്വാർട്ടർ മത്സരം സെപ്റ്റംബർ 18നാണ്. വനിതാ ക്രിക്കറ്റിന്റെ സെമിഫൈനലുകൾ സെപ്റ്റംബർ 20നും ഫൈനൽ സെപ്റ്റംബർ 22നും നടക്കും.