തൃശൂർ: എല്ലാ മാസവും ഒരു പരാതിയുമായല്ല, മറിച്ച് ഒരു പുഞ്ചിരിയും ചെറിയൊരു ചോക്ലേറ്റുമായാണ് അവർ ജില്ലാ കളക്ടറുടെ ചേംബറിലെത്തിയിരുന്നത്. ചെറുപ്പത്തിൽ നഷ്ടപ്പെട്ട മകനെ ഓർമിപ്പിക്കുന്നുവെന്ന് പറഞ്ഞ് കളക്ടറെ സ്വന്തം മകനെപ്പോലെ സ്നേഹിച്ച ആ അമ്മൂമ്മയും മുൻ തൃശൂർ ജില്ലാ കളക്ടർ അർജ്ജുൻപാണ്ഡ്യനും തമ്മിലുള്ള അപൂർവ സ്നേഹബന്ധത്തിന്റെ വീഡിയോയും കുറിപ്പും ഇപ്പോൾ സോഷ്യൽ മീഡിയയിൽ ശ്രദ്ധ നേടുകയാണ്.
അമ്മൂമ്മയോടൊപ്പമുള്ള വീഡിയോ പങ്കുവെച്ചുകൊണ്ടാണ് അർജ്ജുൻപാണ്ഡ്യൻ ഈ ഹൃദയസ്പർശിയായ അനുഭവം വിവരിച്ചത്. തൃശൂർ ജില്ലാ കളക്ടറായി സേവനമനുഷ്ഠിച്ചിരുന്ന കാലത്താണ് ഈ ബന്ധം ആരംഭിച്ചത്.
ജനങ്ങളുടെ പരാതികളും പ്രശ്നങ്ങളും നേരിട്ട് കേൾക്കുന്നതിനായി ദിവസവും സമയം മാറ്റിവെച്ചിരുന്നു. ദിവസവും നിരവധി ആളുകൾ വിവിധ ആവശ്യങ്ങളുമായി ചേംബറിലെത്തുമായിരുന്നു. അത്തരമൊരു ദിവസമാണ് അമ്മൂമ്മ ആദ്യമായി അദ്ദേഹത്തെ കാണാനെത്തിയത്.
“എന്താണ് പരാതി?” എന്ന ചോദ്യത്തിന് അമ്മൂമ്മ പുഞ്ചിരിച്ചുകൊണ്ട് പറഞ്ഞത്, “പരാതിയൊന്നുമില്ല” എന്നായിരുന്നു.
സമീപത്തെ ട്രഷറിയിൽ പെൻഷൻ വാങ്ങാൻ എത്തിയതായിരുന്നു അമ്മൂമ്മ. കളക്ടറെക്കുറിച്ച് കേട്ടപ്പോൾ ഒന്ന് കാണണമെന്ന് തോന്നിയാണ് എത്തിയതെന്നും, ചെറുപ്പത്തിൽ നഷ്ടപ്പെട്ട തന്റെ മകനെ അർജ്ജുൻപാണ്ഡ്യനെ കാണുമ്പോൾ ഓർമവരുന്നുവെന്നും അവർ പറഞ്ഞു.
ആദ്യ കൂടിക്കാഴ്ചയിൽ ഇരുവരും ഒരുമിച്ച് ഒരു ചിത്രം എടുത്തു. എന്നാൽ അതൊരു സാധാരണ കൂടിക്കാഴ്ചയിൽ അവസാനിച്ചില്ല.
അടുത്ത മാസവും അമ്മൂമ്മ വീണ്ടും എത്തി. ഇരുവരും ഒരുമിച്ച് എടുത്ത ചിത്രം പ്രിന്റ് ചെയ്ത് പേഴ്സിൽ സൂക്ഷിച്ചിരുന്നു. ഒപ്പം അർജ്ജുൻപാണ്ഡ്യനായി കരുതിവെച്ച ഒരു ചെറിയ ചോക്ലേറ്റും ഉണ്ടായിരുന്നു.
പിന്നീട് എല്ലാ മാസവും ഇത് പതിവായി മാറി. പെൻഷൻ വാങ്ങാനായി ട്രഷറിയിൽ എത്തുമ്പോൾ അമ്മൂമ്മ നേരെ കളക്ടറേറ്റിലേക്കും എത്തും. പരാതികളോ ആവശ്യങ്ങളോ ഇല്ലാതെ ഒരു പുഞ്ചിരിയും സ്നേഹത്തോടെ കരുതിവെച്ച ചോക്ലേറ്റും സമ്മാനിച്ച് മടങ്ങും.
പിന്നീട് തന്റെ പേരക്കുട്ടികളെയും കൂട്ടി അമ്മൂമ്മ കളക്ടറെ കാണാൻ എത്തിയിരുന്നു. താൻ ജില്ലാ കളക്ടറെ കാണാറുണ്ടെന്ന് പറഞ്ഞപ്പോൾ വിശ്വസിക്കാതിരുന്ന പേരക്കുട്ടികൾക്ക് അത് സത്യമാണെന്ന് തെളിയിക്കാനായിരുന്നു ആ സന്ദർശനം.
2026 മാർച്ചിൽ അർജ്ജുൻപാണ്ഡ്യൻ തൃശൂരിൽ നിന്ന് സ്ഥലം മാറുന്നതുവരെ ഈ ബന്ധം തുടർന്നു. ഓണക്കാലത്ത് അമ്മൂമ്മ അദ്ദേഹത്തിന് സമ്മാനം നൽകിയപ്പോൾ, പിന്നീട് അദ്ദേഹം അമ്മൂമ്മയ്ക്ക് അപ്രതീക്ഷിതമായി ഓണക്കോടി അയച്ചുനൽകുകയും ചെയ്തു.
സമീപകാലത്ത് പുലികളി ആഘോഷങ്ങളുടെ തിരക്കിനിടെ സന്ദർശകനായി വീണ്ടും തൃശൂരിലെത്തിയപ്പോഴാണ് ഈ ബന്ധത്തിന്റെ ആഴം ഒരിക്കൽക്കൂടി അദ്ദേഹം തിരിച്ചറിഞ്ഞത്.
താൻ തൃശൂരിലുണ്ടെന്ന വിവരം അറിഞ്ഞ അമ്മൂമ്മ, പ്രായത്തിന്റെ അവശതകളോ വെയിലോ വകവെക്കാതെ അദ്ദേഹത്തെ അന്വേഷിച്ച് നഗരത്തിലൂടെ നടന്നെത്തി. ഗസ്റ്റ് ഹൗസിൽ വരെ എത്തിയെങ്കിലും അന്ന് അദ്ദേഹം അവിടെയുണ്ടായിരുന്നില്ല. ഈ വിവരം വൈകിയാണ് അർജ്ജുൻപാണ്ഡ്യൻ അറിഞ്ഞത്.
തുടർന്ന് അദ്ദേഹം നേരിട്ട് തൃശൂർ മുതുവറയിലെ അമ്മൂമ്മയുടെ വീട്ടിലെത്തി.
അമ്മൂമ്മ അദ്ദേഹത്തെ ചേർത്തുപിടിക്കുന്നതും ഏറെ സ്നേഹത്തോടെ സ്വീകരിക്കുന്നതും വീഡിയോയിൽ കാണാം. ലളിതമായ ജീവിതസാഹചര്യങ്ങളിലാണ് അമ്മൂമ്മ കഴിയുന്നതെന്ന് അവിടെയെത്തിയപ്പോഴാണ് അടുത്തറിഞ്ഞതെന്ന് അർജ്ജുൻപാണ്ഡ്യൻ കുറിച്ചു.
വീടിന്റെ ചുവരിൽ ഇരുവരും ഒരുമിച്ച് എടുത്ത ചിത്രം ഫ്രെയിം ചെയ്ത് സൂക്ഷിച്ചിരിക്കുന്നത് കണ്ടതും അദ്ദേഹത്തെ വികാരാധീനനാക്കി. പരിമിതമായ സാഹചര്യങ്ങൾക്കിടയിലും എല്ലാ മാസവും തനിക്കായി ഒരു ചോക്ലേറ്റ് കരുതിവെച്ചിരുന്ന അമ്മൂമ്മയുടെ സ്നേഹവും അദ്ദേഹം കുറിപ്പിൽ ഓർത്തെടുത്തു.
“ജീവിതം നൽകുന്ന പദവികളും കസേരകളും താൽക്കാലികമാണ്. എന്നാൽ മനുഷ്യർ നൽകുന്ന സ്നേഹവും ചില അപൂർവ ബന്ധങ്ങളും എന്നും ഹൃദയത്തിൽ ബാക്കിയാകും” എന്ന ഓർമപ്പെടുത്തലോടെയാണ് അർജ്ജുൻപാണ്ഡ്യൻ തന്റെ അനുഭവം പങ്കുവെച്ചത്.